काठमाडाैं ३०, भदाै । तीनकुनेस्थित गैह्रीगाउँमा चार जनाको विभत्स हत्या भएको छ । गैह्रिगाउँकाे दिव्य सः मिलमा सुरक्षा गार्डको जिम्मेवारीमा रहेका दोलखाका कुमार भुजेलसहित चार जनाको हत्या भएको हो ।

काष्ठ मिलमा सुरक्षा गार्डको रुपमा काम गर्ने ५६ वर्षीय कुमार भुजेल, उनकी श्रीमती अम्बिका भुजेल, आमा शुभद्रा भुजेल र मोरङ बेलवारी स्थायी घर भएका २० वर्षीय नविन राईको हत्या भएको हो ।

उपत्यका प्रहरी कार्यालय रानीपोखरीका प्रवक्ता दिनेशराज मैनालीका अनुसार घटनास्थलबाट सोधपुछको लागि काठमाडौं महानगरपालिका–३२ तीनकुने बस्ने २८ वर्षीय दिपेन्द्र राईलाई नियन्त्रणमा लिइएको छ ।

राईलाई कपडा र जुत्तामा रगत लागेको तथा मदिरा सेवन गरेको अवस्थामा प्रहरीले नियन्त्रणमा लिएको हो । घटना राति १२ बजेतिरको भएको अनुमान गरिएको छ । घटनाको अनुसन्धानका लागि तालिमप्राप्त प्रहरी र कुकुरको समेत परिचालन गरिएको छ । हत्या भएका चारै जनाको शव त्रिवि शिक्षण अस्पताल पठाइएको छ ।