काठमाडौं, १० असोज । नेपाल मेडिकल कलेजमा मुत्रथैलीको क्यान्सर पिडित बृद्धको सफल उपचार गरिएको छ । गत भाद्र २१ गते कलेजको युरोलोजी विभागले कागेश्वरी मनहरा नगरपालिका डाँछीका ७१ वर्षीय गंगाप्रसाद बजगाईंको मुत्रथैलीको क्यान्सरको सफल उपचार गरेको हो ।

पिसाब गर्ने क्रममा अकस्मात बाक्लो रगत आएपछि उपचारका लागि नेपाल मेडिकल कलेज आएका बजगाईंको कन्सल्टेन्ट यूरो सर्जन, यूरो ट्रान्सप्लान्ट विशेषज्ञ डाक्टर वेस अन्सारीको टीमले सफलतापूर्वक शल्यक्रिया गरेका हुन् । इन्डोस्कोपिक प्रविधिबाट गरिएको शल्यक्रियामा बिरामी बजगाईंको मुत्रथैलीबाट विभिन्न साइजका तीनवटा ट्युमरहरु निकालिएको थियो । ‘बृद्धावस्थासँगै दम, रगतको कमी भएकाले उहाँको अप्रेसन गर्न च्यालेञ्ज नै थियो । तथापि, हाम्रो टीमले सबैकुरा मेडिकल्ली म्यानेज गरेपछि मात्र अप्रेसन गर्यौं । अहिले उहाँको अवस्था एकदम ठिक छ ।’ यूरो ट्रान्सप्लान्ट विशेषज्ञ डा.अन्सारीले भने ।

कन्सल्टेन्ट यूरो सर्जन, यूरो ट्रान्सप्लान्ट विशेषज्ञ डाक्टर वेस अन्सारी, एनएमसी

अप्रेसनमा डा.अन्सारीलाई डा.हेमन्त पुन तथा यूरोलोजी विभागकी प्रमुख नर्स विना लगायतले सहयोग गरेका थिए । डा. अन्सारीका अनुसार लगातार धुम्रपान गर्ने व्यक्तिहरुमा मुत्रथैलीको क्यान्सर हुने अधिक संभावना हुन्छ । त्यसवाहेक परिवारमा कसैलाई मुत्रथैलीको समस्या भए, रबर तथा प्लास्टिक फ्याक्ट्रीमा काम गर्ने, प्रिन्टिङ क्षेत्रमा काम गर्नेहरुलाई मुत्रथैलीको संभावना अत्याधिक हुने गर्छ । यस्ता क्षेत्रमा काम गर्नेहरुले बढी नै सतर्कता अपनाउनु पर्ने डा.अन्सारीको सल्लाह छ ।

मुत्रथैलीको क्यान्सरमा पिसाबमा रगत देखिने, खान मन नलाग्ने, कमजोरी महशुष हुन्छ । एडभान्स किसिमको क्यान्सर छ भने मिर्गौला भएको ठाउँ कोखा दुख्ने, मिर्गौला सुन्निने, ज्वरो आउने लगायतका लक्षण पनि देखिने गर्छ । मुत्रथैलीमा हुने क्यान्सरमा सुरुको अवस्थामा सानो मासु पलाउने र विस्तारै मुत्रथैलीमा फैलने गर्दछ ।

कलेजले पछिल्लो समय विशेषज्ञ चिकित्सकहरु थप्दै स्वास्थ्य सेवालाई गुणस्तरीय र प्रभावकारी बनाएपछि जटिल केसहरुको पनि उपचार हुँदै आइरहेको छ । कलेजमा क्यान्सरजन्य रोगहरुको सफल शल्यक्रिया गरिनुको साथै किमो, रेडियोथेरापी समेत हुने गरेको छ । अस्पतालले मिर्गौला रोग र क्यान्सरको लागि विशेष उपचार गरिरहेको कलेजका निर्देशक जहाँगिर अन्सारीले बताए । कलेजमा मिर्गौला डायलाइसिसका अत्याधुनिक उपकरण सहितको छुट्टै सेन्टर छ ।