काठमाडौं, १४ असोज । चीनमा जारी एसियन गेमको टि ट्वान्टी २० क्रिकेटमा नेपालले माल्दिभ्सलाई १३८ रनले पराजित गर्दै क्वाटरफाइनलमा प्रवेश गरेको छ । ग्रुप स्टेज ए अन्तरगतको दोश्रो खेलमा नेपालले माल्दिभ्सलाई १३८ रनले पराजित गरेको हो ।

नेपाल समुह ए विजेता बन्दै अन्तिम आठमा प्रवेश गरेको हो । टस जितेर ब्याटिङ रोजेको नेपालले निर्धारित २० ओभरको समाप्तिमा सात विकेटको क्षतिमा २१२ रनको स्कोर खडा गरेको थियो । जवाफी ब्याटिङमा माल्दिभ्सले दुई बल बाँकी छँदा ७४ रनमा अल आउट भयो ।

नेपालकालागि बलिङका अभिनाश बोहराले ३.४ ओभरमा ११ रन खर्चिँदै छ विकेट लिए । भने, सन्दीप लामिछाने, गुल्सन झा, सोमपाल कामी र कुशल भुर्तेलले समान एक एक विकेट लिए ।

माल्दिभ्सका घानी अब्दुलले सबैभन्दा बढी ३६ रन जोडे । घानीले ३४ बलमा दुई चौका र दुई छक्का प्रहार गरे । फरिदले १० रन जोड्दा इस्माइली तीन रन र अजिन शून्यमा आउट भए । भने अन्य छ ब्याटर शून्यमा आउट भए ।

नेपालका लागि कप्तान रोहित पौडेलले २७ बलमा तीन चौका र तीन छक्काको मद्दतमा अर्धशतक प्रहार गरे । उनले ५२ रन जोडे । गुल्सन झाले २१ बलमा एक चौका र तीन छक्का प्रहार गर्दै ३५ रन जोडे । कुशल मल्लले नटआउट ४७ रन जोड्दा २० बलमा समान ३ चौका छक्का प्रहार गरे ।

यस्तै, नेपालका ओपनर कुशल भुर्तेलले १८ बलमा ५ चौका र एक छक्का सहित ३५ रन जोडे । ओपनर आसिफ शेख ६ रनमै आउट भए । विनोद भण्डारी १५ बलमा १३ रन, सन्दीप जोरा पाँच रन र दीपेन्द्रसिंह ऐरी छ रनमा आउट भए ।

बलिङमा माल्दिभ्सका बदिउल स्माइल नाजवानले ३ विकेट लिन सफल भए । नसीर नाइल स्माइल, मोहम्मद म्युभान र थोलाल मोहम्मद रायाले एकरएक विकेट लिए ।