काठमाडौं, १४ असोज । सरकारले नेपाल चिकित्सक संघ र आवासिय चिकित्सकहरुसँग कार्यस्थल सुरक्षाको सहमति गरेको २४ घण्टा नपुग्दै काठमाडौं मेडिकल कलेजका डाक्टरमाथि कुटपिट भएको छ ।

हिजाे मात्रै सरकार र आन्दोलनरत चिकित्सकबीच सहमति भएसँगै डाक्टरहरु काममा फर्कीएका थिए । सुरक्षित कार्यस्थलको माग राख्दै आन्दोलनमा रहेको ‘स्वास्थ्यकर्मीका लागि सुरक्षित कार्यस्थल संघर्ष समिति’सँग उपप्रधानमन्त्री एवम् गृहमन्त्री नारायणकाजी श्रेष्ठको उपस्थितिमा गृह मन्त्रालयमा भएको वार्ताबाट ६ बुँदे सहमतिसँगै उनीहरु काममा फर्किएका थिए ।

उक्त सहमतिकाे मसी नसुक्दै डाक्टरमाथि कुटपिट भएपछि सरकार डाक्टरहरूकाे सुरक्षाप्रति संवेदनशील नदेखिएकाे एक चिकित्सकले बताए । हिजो मात्रै सरकारले स्वास्थ्य संस्था, स्वास्थ्यकर्मी माथि सुरक्षा प्रदान गर्न सहमति गरिएपनि केएमसीका चिकित्सक माथि आक्रमण भएको हो । कलेजको नेफ्रोलोजी विभागमा उपचारका लागि ल्याएको बिरामीका आफन्तले त्यहाँ कार्यरत इन्र्टन डाक्टर मनिष खड्कामाथि कुटपिट गरेका हुन् ।

‘नेफ्रोलोजी विभागमा बिरामीहरुको भिडभाड थियो, हामीले बिरामीलाई पालैपालो ल्याउन आग्रह गरिरहेका थियौं । डा. मनिष खड्काले भिडभाड नगरी पालैपालो आउनु आग्रह गरिरहनु भएको थियो । त्यहिक्रममा एक जना बिरामीको नाम लिएर बाहिर बोलाउन जाँदा ३,४ जनाले हेलमेट समेतले कुटपिट गरे ।’ घटनाका प्रत्यक्षदर्शी डा. संजीव यादवले भने ।

प्रहरीले कुटपिटमा संलग्न २ जनालाई पक्राउ गरेपछि चिकित्सकहरुले कार्यस्थलको सुरक्षा तथा डाक्टरमाथि कुटपिटमा संलग्नलाई कडा कारवाहीको माग गरेका छन् । अस्पतालका चिकित्सकहरुले आन्दोलन गर्दै दोषीमाथि कडा कारवाहीको माग गर्दै अस्पताल परिसरमा प्रदर्शन र नाराबाजी गरे । इमरजेन्सी सेवा वाहेक अन्यत्रका चिकित्सकहरु आन्दोलनमा उत्रिएपछि अस्पतालको स्वास्थ्य सेवा प्रभावित भयो । डाक्टरहरुले घटनामा संलग्नलाई पक्राउ गरेपनि प्रहरी सुरक्षाकर्मीले नै एक पल्टलाई छोडदिउँ भन्दै पक्राउ गरेकालाई छोडिदिएको बताएका छन् ।

यसअघि पोखराको मणिपाल कलेज, हेटौडाको सञ्चो अस्पताल, लमजुङको जिल्ला अस्पताल तथा चितवनको माडी अस्पतालमा चिकित्सकमाथि आक्रमण भएको थियो ।

हेर्नुहोस फोटो फिचर