भक्तपुर, १५ असोज । मुनाफारहित सामाजिक शैक्षिक संस्थाका रूपमा दर्ता भई सञ्चालित नेपाल इन्जिनियरिङ कलेज भक्तपुरमा ‘नेक इन्जेनियम २०२३’ हुने भएको छ । भक्तपुरको दुवाकोट चाँगुनारायणमा स्थित कलेजमा असोज १८ गते विहीबार नेक इन्जेनियम हुन लागेकाे हाे ।

इन्जिनियरिङ विधाका विविध विषयमा अध्ययनरत विद्यार्थीहरूले हासिल गरेकाे ज्ञान सीप र प्रतिभा प्रस्फुटन गराउने उद्देश्यले कार्यक्रम आयाेजना गरिएकाे हाे । कार्यक्रममा १२ कक्षा पास गरेका विद्यार्थीहरूले समेत सहभागीता जनाउन पाउनेछन् ।

प्रदर्शनीमा ब्याच वाइज प्रोजेक्ट प्रतियोगिता, ओपन प्रोजेक्ट प्रतियोगिता, पोस्टर डिस्प्ले प्रतियोगिता, रोबोटिक्स प्रतियोगिता, पेपर ब्रिज डिजाइन प्रतियोगिता, फास्टेस्ट कोडिङ प्रतियोगिता र ओपन साइन्ससहित विभिन्न प्रकारका प्रतियोगिताहरू सञ्चालन गरिने प्रतियाेगिताका संयाेजक समेत रहेका कलेजका एसोसिएट प्रोफेसर विजय श्रेष्ठले जानकारी दिए ।

‘नेकमा अध्ययनरत विद्यार्थीहरूले हासिल गरेकाे ज्ञान, सीपलाई प्रस्फुटन गर्ने तथा कक्षा १२ पास गरेका विद्यार्थीहरूलाई समेत प्रतिभा प्रस्फुटन गराउने उद्देश्यले कार्यक्रम तयार पारिएकाे छ । भने, इन्जिनियरहरू, आविष्कारकहरू र समस्या समाधानकर्ताहरूको भावी पुस्तालाई उनीहरूको कडा परिश्रमको इनाम दिँदै उत्प्रेरणा प्रदान गर्न कार्यक्रमले टेवा दिन्छ ।’ कार्यक्रम संयाेजक श्रेष्ठले भने । ‘विचारलाई यथार्थमा रूपान्तरण गर्दै’ भन्ने नाराका साथ प्रदर्शनी र प्रतियोगिता हुन लागेको हाे ।

प्रदर्शनीका लागि प्रभु बैंक, सिद्धार्थ बैंक, नेपाल इको प्यानललगायतको प्रायोजन रहेको छ । नवप्रवर्तन र शिक्षालाई बढावा दिन प्रायोजकहरुको प्रतिबद्धताले प्रदर्शनीलाई समृद्ध बनाउने र उनीहरूले विजेताहरूलाई दिइने पुरस्कारहरूमा पनि योगदान पुर्याउने विश्वास आयोजकको छ ।