काठमाडाैं, २५ असाेज । सरकारले इजरायलबाट नेपाली ल्याउन नेपाल एयरलाइन्सको जहाज पठाएकाे छ । नेपाल वायुसेवा निगमको 'एननाइन एलवाइजेट' कलसाइन रहेको वाइडबडी ए-३३० जहाज आज बिहान ४ बजे इजरायलका लागि उडेको छ ।

निगमका प्रवक्ता रमेश पौडेलका अनुसार बिहान गएकाे उक्त जहाज बेलुका ९:१० बजे त्रिभुवन अन्तर्राष्ट्रिय विमानस्थलमा अवतरण गर्नेछ । परराष्ट्र मन्त्री एनपि साउद र मन्त्रालयका सहसचिव शरदराज आरण पनि इजरायल गएका छन् । जहाज दुबई ट्रान्जिट हुँदै इजरायल जानेछ ।

इजरायलकाे नेपाली राजदूतावासको सम्पर्कमा आएका विद्यार्थीहरूलाई सुरूमा उद्धार गरिने मन्त्रालयकी प्रवक्ता तथा सहसचिव सेवा लम्सालले बताइन् । युद्धग्रस्त क्षेत्रबाट फर्कन ३५० भन्दा बढी नेपाली विद्यार्थीले फाराम भरेका छन् । इजरालयलमा रहेका नेपालीलाई नेपाल सरकारकै खर्चमा स्वदेश ल्याउन लागिएकाे हाे । मृत्यु भएका १० नेपालीकाे शव ल्याउन भने केही समय लाग्छ ।

प्यालेस्टाइनको इस्लामिस्ट समूह ‘हमास’ले शनिबार आक्रमण गरेपछि १० जना नेपाली विद्यार्थीको समेत मृत्यु हुँदा अन्यले बंकरभित्र लुकेर ज्यान जोगाएका थिए । प्रवक्ता लम्सालका अनुसार आज गएको २७४ यात्रु क्षमताका वाइडबडी विमानमा २५४ जना विद्यार्थी नेपाल फर्कने र लगत्तै अन्यलाई पनि नेपाल फर्काइने छ ।