काठमाडौं, २५ असाेज । फिफा बरियतामा नेपालभन्दा पुछारमा रहेकाे लाओसले नेपालकाे घरेलु मैदानमा बराबरी खेलेकाे छ । बिहीबार दशरथ रंगशालामा विश्वकप छनाैट प्रारम्भिक खेलमा नेपाल लाओससँग बराबरीमा राेकिएकाे हाे ।

खेलकाे पहिलाे हाफमा १ गाेले पछि परेकाे स्थितिमा दाेश्राे हाफमा नेपालका लागि फर्वार्ड अञ्जन विस्टले लाओससँगकाे हार टारे । राष्ट्रिय टिमका फरवार्ड अञ्जनले  १ गाेल गर्दै नेपालका लागि बिहीबार सर्वाधिक गोलको कीर्तिमान पनि बराबरी गरेका छन् । उनले घरेलु मैदानमा नेपालका लागि १३ औं व्यक्तिगत गोल पूरा गरे ।

अञ्जनले हरि खड्का र नीराजन रायमाझीको नाममा रहेको १३ गोलको कीर्तिमान बराबरी गरेका हुन् । उनले ४८ औं मिनेटमा एरिक विष्टको कर्नरमा हेड गोल गरे । सन् २०१९ मा उनले चिनियाँ ताइपेयीविरुद्ध पहिलो गोल गरेका अञ्जनसँग हरि र निराजनलाई उछिनेर नेपालका लागि सर्वाधिक गोलको कीर्तिमान बनाउने अवसर छ । र, त्याे अवसर १८ अक्टाेवरमा लाओसकाे घरेलु मैदानमा हुने खेल हुनेछ ।

खेलमा लाओसले ३३ औं मिनेटमा कफ्तान बौनान बौनकोङको गोलले अग्रता लिएको थियो । पहिलो हाफमा कमजाेर प्रदर्शन गरेकाे नेपालले दाेश्राे हाफमा कमब्याक खेल्दै लाओसमाथि दवाब दिएकाे थियाे । लाओसमा हुने खेलकाे नजिता नेपालकाे पक्षमा भए विश्वकपकाे दाेश्राे चरणमा प्रवेश गर्नेछ ।