काठमाडौं, ७ मंसिर । जनता र राष्ट्रकाे पक्षमा सरकारले काम नगरे प्रधानमन्त्री पुष्पकमल दाहाल ‘प्रचण्ड’ लाई सडकमा पछार्ने नेकपा एमालेका पोलिटब्युरो सदस्य महेश बस्नेतले चेतावनी दिएका छन् । प्रधानमन्त्री प्रचण्ड नसच्चिए एमालेले प्रधानमन्त्रीकाे कुर्सीबाट सडकमा पछार्ने बस्नेतले चेतावनी दिएका हुन् ।

बिहीबार तीनकुनेमा सरकारविरुद्ध आयोजित विरोध सभालाई सम्बोधन गर्दै युवा सङ्घका संयोजक समेत रहेका बस्नेतले एमालेको कार्यक्रम अब सातै प्रदेशमा विस्तार हुने र उक्त आन्दोलनपछि एमाले नेतृत्वमा सरकार बन्ने समेत ठाेकूवा गरे ।

‘प्रधानमन्त्री प्रचण्डज्यू कान खोलेर सुन्न चेतावनी दिन्छु–तपाईँ सच्चिनु भएन भने नेपाली जनताको भविष्य अन्धकार बनाउनुभयो भने सिंहदरबारको कुर्सीबाट ल्याएर माइतीघर मण्डलामा पछार्ने हो कि तीनकुनेमा पछार्ने हो ? त्यो तागत युवा विद्यार्थीहरूसँग छ, एमालेसँग छ’, बस्नेतले भने ।

युवा संघलाई चुनौती दिन खोज्ने दुर्गा प्रसाईंकाे आजबाट हावा खुस्किएकाे बताउँदै बस्नेतले भने ‘एमालेले समाज रुपान्तरणको अभियान चलाउने हो । हामी कसैलाई हस्तक्षेप गर्दैनौं । कसैको विरुद्ध कार्यक्रम गर्दैनौं । तर, हाम्रो कार्यक्रमविरुद्ध काेही निँहु खोजेर आउँछ भने हामी छाड्दैनौं । दुर्गा प्रसाईंको आजबाट हावा खुस्किएको छ ।’

पार्टी अध्यक्ष केपी ओलीको नेतृत्वमा मध्य पहाडि लोकमार्ग केन्द्रीत अभियान सकाएपछि जनप्रदर्शनको कार्यक्रमलाई सात प्रदेशमा विस्तार गर्ने गर्ने र प्रचण्ड सरकार ढाल्ने बस्नेतकाे दाबी छ । ‘सम्भवत हामी फागुनमा काठमाडौंमा मानवसागर उतार्छौ‌ं । त्यसपछाडि यी अराजकतावादी, अपराधि र तस्करहरुलाई सदाको लागि सफा गर्छौं ।’