नोबेल मेडिकल कलेजलाई सामाजिक सुरक्षा दिवसमा सम्मान
काठमाडौं, ११ मंसिर । सामाजिक सुरक्षा कोषमा सूचीकृत रोजगार दाताहरुमध्ये योगदानकर्ताहरुको संख्याका आधारमा उत्कृष्ट रहन सफल बिराटनगरको नोबेल मेडिकल कलेजलाई सम्मान गरिएको छ । आर्थिक वर्ष २०७९/८० मा स्वास्थ्य क्षेत्रबाट कोषमा सूचीकृत रोजगार दाताहरुमध्ये योगदानकर्ताहरुको संख्याका आधारमा उत्कृष्ट छनौट हुँदै नोबेल मेडिकल कलेज सम्मानीत भएको हो ।
आज राष्ट्रिय सभागृहमा छैटौं सामाजिक सुरक्षा दिवसको अवसरमा आयोजित विशेष समारोहमा प्रधानमन्त्री पुष्पकमल दाहाल ‘प्रचण्ड’ श्रम, रोजगार तथा सामाजिक सुरक्षामन्त्री शरदसिं भण्डारीले नोबेल मेडिकल कलेजलाई सम्मान गरे । उक्त सम्मानपत्र नोबेलका तर्फबाट नारायण प्रसाद दाहालले ग्रहण गरे ।
कोशी प्रदेशको स्वास्थ्य सेवामा महत्वपूर्ण योगदान पुर्याएको तथा श्रमिकलाई कोषमा आबद्ध गरेकाले नोबेल मेडिकल कलेजलाई सम्मान गरिएको हो । सांसद डाक्टर सुनिलकुमार शर्माको नोबेलले निःशुल्क स्वास्थ्य शिविरबाट हज्जारौं विपन्न, असहाय तथा सर्वसाधारण जनतालाई सेवा प्रदान गर्दै आइरहेको छ । सांसद शर्माले गरिब विपन्न नागरिकलाई घरदैलोमै स्वास्थ्य सेवा दिनुपर्छ भनेर निःशुल्क स्वास्थ्य शिविर चलाउँदै आइरहेका छन् ।
आयोजित कार्यक्रममा सरकारले ल्याएको योगदानमा आधारित सामाजिक सुरक्षा प्रणालीलाई सफल बनाउन योगदान गर्ने निजी क्षेत्रलाई प्रधानमन्त्री प्रचण्डले धन्यवाद दिए । ५ लाख श्रमिकहरु सामाजिक कोषमा आबद्ध भइसकेको अवस्थामा विदेशमा रहेका नेपालीहरु र अनौपचारिक क्षेत्रमा रहेका श्रमिकहरुलाई पनि कोषमा आबद्ध हुन प्रधानमन्त्रीको अनुरोध छ ।
२०७६ चैत ७ गतेबाट सञ्चालनमा आएको कोषले छैटौं वर्षमा आइपुग्दा ४४ अर्ब ८५ करोड रुपैयाँ संङ्कलन गरेको छ । कोषमा हालसम्म ९ लाख २८ हजार ४५३ जना योगदानकर्ता रहेको तथा १८ हजार ४३९ रोजगारदाता सूचीकृत भएका छन् । कोषले हालसम्म विभिन्न सुविधा अन्तर्गत ६ अर्ब ४४ करोड रुपैयाँ प्रदान गरेको छ ।
वैदेशिक रोजगारीमा गएका ४ लाख ६६ हजार ६२२ जना, स्वरोजगारमा ३२ जना र अनौपचारिक तर्फ ३ जना आबद्ध भएका छन् । कोषबाट सुविधा प्राप्त गर्न १२ महिनामा कम्तीमा ९ महिनाको योगदान हुनुपर्ने छ ।
सरकारले प्रत्येक वर्षको मंसिर ११ गतेलाई सामाजिक सुरक्षा दिवसको रुपमा मनाउने गरेको छ । सोहीअनुसार आज सामाजिक सुरक्षा दिवस मनाइएको हो ।
0 प्रतिकृया