धरान, १४ मंसिर । सुनसरीको इटहरीमा जङ्गली हात्तीको आक्रमणबाट एक जनाको ज्यान गएको छ । ज्यान जानेमा ईटहरी उपमहानगरपालिका वडा नम्बर २ शान्तिझोडाका २५ बर्षिया रबिन खड्का रहेका छन् ।

शान्तिझोडा वनबाट आएको जङ्गली हात्तीले आक्रमण गर्दा खड्काको ज्यान गएको हो । घर नजिकै जङ्गली हात्ती निस्किएकोले धपाउने क्रममा स्थानीय २५ बर्षिया रबिन खड्कालाई हात्तीले कुल्चिएर मारेको प्रहरीले जनाएकाे छ ।

उक्त घटनाको खबर स्थानीय प्रहरीलाई प्राप्त भएसँगै इलाका प्रहरी कार्यालय इटहरीबाट घटनास्थलमा प्रहरीको टोली खटेर सम्पुर्ण कानुनी प्रकृया पश्चात शवलाई परिक्षणको लागि बिपि कोईराला स्वाथ्य बिज्ञान प्रतिष्ठान धरान ल्याईएको र उक्त घटनाबारे थप अनुसन्धान भईरहेको जिल्ला प्रहरी कार्यालय सुनसरीले जनाएको छ ।

यसैविच, जङ्गली हात्तीको आक्रमणबाट मृत्यु भएका खड्काको परिवारलाई इटहरी उपमहानगरपालिकाले एक लाख रुपैयाँ आर्थिक सहायता प्रदान गर्ने भएकाे छ । खड्काको परिवारलाई इटहरी उपमहानगरपालिकाका मेयर हेमकर्ण पौडेलले बिहीबार बिहान घरमै पुगेर आर्थिक सहायता दिने घोषणा गरेका हुन् ।