काठमाडौं । नेपाल इन्जिनियरिङ कलेज (नेक) ले स्नातक तहमा नयाँ शैक्षिक सत्रका लागि भर्ना भएका विद्यार्थीहरुका लागि सचेतना कार्यक्रम आयोजना गरेको छ । शुक्रबार इन्जिनियरिङका विभिन्न विषयमा अध्यनार्थ भर्ना भएका विद्यार्थीहरुलाई कलेजको शैक्षिक, प्रशासनिक र करियरसँग लक्षित विषयमा सचेतना दिइएको हो ।

सचेतना कार्यक्रममा सिभिल इन्जिनियरिङ, कम्प्युटर इन्जिनियरिङ, इलेक्ट्रिक एण्ड इलेक्ट्रोनिक्स, इलेक्ट्रोनिक्स एण्ड कम्युनिकेशन, आर्टिटेक्ट, सिभिल एण्ड रुरल, साइन्स एण्ड ह्युमानिटी विषय अध्ययनकालागि भर्ना भएका विद्यार्थीहरुको सहभागीता रहेको थियो ।

कार्यक्रममा बोल्दै कलेजका कार्यवाहक प्राचार्य दुर्गा प्रसाद भण्डारीले इन्जिनियरिङ अध्ययनका लागि नेकलाई छनौट गरेकोमा धन्यवाद दिँदै विद्यार्थीहरुलाई स्नातक तहको चार वर्ष आफ्नो करियर प्रति सचेत भएर अध्ययन गर्न सल्लाह दिए । इन्जिनियरिङ गर्न विद्यार्थीमा लगनशीलता, धैर्यता र दृढ इच्छाशक्ति हुनुपर्ने बताउँदै उनले विद्यार्थीको सिकाईमा कलेजले कुनैपनि कम्प्रोमाइज नगर्ने बताए । ‘अब प्लस टू, माध्यामिक तहमा जस्तो शिक्षकले कान समाएर पढाउने हुँदैन, विद्यार्थी आफैं सचेत र करियर प्रति फोकस भएर अध्ययन गर्नुपर्छ ।’ हरेक विषयहरुमा फूलटाइम फ्याकल्टीहरु रहेकाले विद्यार्थीहरुले पढाईका सवालमा फ्याकल्टीहरुसँग जुनसुकै बेला अन्तरक्रिया गर्नसक्ने वातावरण रहेको जनाए ।

विद्यार्थीहरुको सिकाईकालागि कलेजले सैद्धान्तिक ज्ञानसँगै ब्यवहारिक र प्रयोगात्मक शिक्षक विधिलाई बढी फोकस गर्ने बताउँदै कार्यवाहक प्राचार्य भण्डारीले विद्यार्थीहरु र शिक्षकहरुको समन्वय र सहकार्य अपरिहार्य भएको जिकीर गरे । भर्खर माध्यामिक तह पार गरेर आएका विद्यार्थीहरुलाई सुरुमा नयाँ नयाँ विषयहरु आउँदा केही गाह्रो भएता पनि हतोत्साहित नभइकन धैर्यता र मेहनतले अध्ययन गर्न सुझाए । ‘शिक्षकहरुको चाहनाले मात्रै विद्यार्थीको भविष्य बन्दैन, विद्यार्थीले पनि आफ्नो करियर उज्ववल बनाउन लगनशील भएर पढ्नु पर्छ । सिक्ने र सिकाउने सवालमा कलेज तपाईहरुसँग हातेमालो गरेर अगाडी बढ्छ ।’ कार्यवाहक प्राचार्य भण्डारीले भने ।

सचेतना कक्षामा कलेजका विज्ञान तथा मानविकी संकायका एशोसिएट प्रोफेसर युवराज गैरेले भोलीको सफल इन्जिनियर बन्न आएका विद्यार्थीहरुलाई आफ्नो भविष्य प्रति जिम्मेवार भएर अध्ययन गर्न सल्लाह दिए । विद्यार्थीसँग कुनैपनि शैक्षिक विषयमा जुनसुकै बेला अन्तरक्रिया र छलफल गर्न फ्याकल्टीहरु तयार रहेको जनाउँदै विद्यार्थीहरुमा पनि सिक्ने र ज्ञान हासिल गर्छुभन्ने हुटहुटी हुनुपर्ने बताए ।

सो क्रममा कलेजका विभागीय प्रमुखहरुले आ–आफ्ना विषयगत विद्यार्थीहरुलाई पाठ्यक्रम, पढाउने शैली लगायतका बारेमा जानकारी दिएका थिए । पोखरा विश्वविद्यालयकै उत्कृष्ट शैक्षिक संस्थाको रुपमा रहेको नेकमा स्नातक, स्नातकोत्तर तहमा अध्ययन अध्यापन हुने गरेको छ ।

कलेजमा विद्यार्थीको सिकाईकालागि अत्यावश्यक ल्याब, सुविधा सम्पन्न पुस्तकालय र रिसर्च सामग्रीहरु रहेका छन् । भने, विद्यार्थीलाई अन्तराष्ट्रिय एक्सपोज दिने अभिप्रायले कलेजले युरोप, जापान जस्ता देशका प्रतिष्ठित विश्वविद्यालय र कलेजहरुसँग शैक्षिक सहकार्य गरिरहेको छ ।