बिरगञ्ज । नेशनल मेडिकल कलेजले आयोजना गरेको एकदिने निःशुल्क स्वास्थ्य शिविरमा स्वास्थ्य जाँच गराउने बिरामीहरुको घुँईचो लागेको छ । बाराको प्रसौनी गाउँपालिकामा आयोजित एक दिने बृहद् निःशुल्क स्वास्थ्य शिविरमा स्वास्थ्य जाँच गराउनेको संख्या ९ सय बढी रहेको छ ।

शनिबार गाउँपालिकाको संयोजनमा भएको निःशुल्क स्वास्थ्य शिविरमा महिला, बालबालिका, ज्येष्ठ नागरिकसँगै सो पालिकाका सर्वसाधारणको स्वास्थ्य जाँच गरिएको नेशनल मेडिकल कलेजकी कार्यकारी अस्पताल निर्देशक डा. इशरत जहाँले जानकारी दिइन् । शिविरमा स्वास्थ्य जाँच गराउन आएकाहरूमा शरीर दुख्ने, ज्वराे आउने तथा आँखा र दाँत सम्बन्धी समस्याहरू देखिएकाे थियाे ।

शिविरमा जनरल मेडिसिन, स्त्री रोग, बाल रोग तथा आँखा रोग र दन्त रोग सम्बन्धी चिकित्सकहरुले सेवा दिएका थिए । प्रसौनी ४ स्थित रिलायन्स एकेडेमीमा निःशुल्क स्वास्थ्य शिविर सञ्चालन गरिएकाे थियाे ।

कलेजले सामाजिक उत्तरदायित्व अन्तरगत स्वास्थ्यको पहुँचबाट टाढा रहेका सर्वसाधारणलाई घरदैलोमै सेवा प्रदान गर्न निःशुल्क स्वास्थ्य शिविर आयोजना गरेको हो । मधेश प्रदेसकै एक मात्र सुविधा सम्पन्न कलेजले सर्वसुलभ रुपमा गुणस्तरीय स्वास्थ्य सेवा प्रदान गरिरहेको छ ।