काठमाडौं। संघीय सरकार प्रदेशहरूलाई बलियाे बनाउन अधिकार बाँडफाँडमा अनुदार देखिएपछि संविधानमा व्यवस्था भएको तहगत अधिकारका बारेमा छलफल गर्न सातै प्रदेशका मुख्यमन्त्रीहरू हेटौँडामा भेला हुने भएका छन् ।

आज सातै प्रदेशका मुख्यमन्त्रीहरू संविधानमा व्यवस्था भएको प्रदेश र स्थानीय सरकारको अधिकारका बाँडफाँडमा समस्या देखिएको समयमा छलफल र संविधान कार्यान्वयनका लागि आवश्यक सुझाव दिने उद्देश्यसहित बागमती प्रदेशकाे राजधानी हेटौँडामा भेला हुने भएका हुन् ।

बागमती प्रदेशको मुख्यमन्त्री तथा मन्त्री परिषद् कार्यालयले सातै प्रदेशका मुख्यमन्त्रीहरूको सहभागितामा तहगत अधिकारको कार्यविस्तृतिकरण सम्बन्धी संगोष्ठी आयोजना गरिएको जनाएको छ । उक्त संगोष्ठीमा तीनै तहका सरकारको साझा अधिकारको विस्तृतीकरण र कानुन निर्माण प्रक्रिया, बित्त/आर्थिक विकास क्षेत्र, सेवा क्षेत्र, पूर्वाधार क्षेत्र र वन वातावरण तथा विपत् व्यवस्थापन क्षेत्रको बारेमा कार्यपत्र प्रस्तुतिसँगै छलफल हुनेछ ।

भोलीसम्म हुने कार्यक्रममा सातै प्रदेशका प्रमुख सचिव, मुख्य न्यायधिवक्ता, गाउँपालिका राष्ट्रिय महासंघ, नेपाल नगरपालिका संघका पदाधिकारीहरूको सहभागिता रहने छ । मुख्यमन्त्री कार्यालयका अनुसार छलफलपछि शुक्रवार साझा प्रतिवेदनसमेत अनुमोदन गर्ने कार्यक्रम रहेको छ ।

संघीय सरकारले संविधानमा उल्लेख अधिकारहरू प्रत्यायाेजन नगर्दा प्रदेश र स्थानीय तहले साेचे अनुरूप काम गर्न नसकेकाे गुनासाे छ ।