काठमाडौं । माघ ११ गते हुन गइरहेकाे राष्ट्रिय सभा निर्वाचनका लागि नेकपा एमालेले उम्मेदवार टुंगाे लगाएकाे छ । एमालेले राष्ट्रियसभा निर्वाचनका लागि सबै १९ सिटकै उम्मेदवार टुंगो लगाएको हाे ।

महासचिव शंकर पोखरेलले उम्मेदवारहरुको नामावली सार्वजनिक गर्दै कोशी प्रदेसबाट महिलाबाट सुनसरीकी रुक्मिणी काेइराला र अन्यबाट भोजपुरका पर्शुराम अधिकारीलाई उम्मेदवार बनाउने जनाएका छन् ।

एमालेले मधेश प्रदेसबाट महिलातर्फ पर्साकी उषादेवी थरुनी र अन्यबाट महोत्तरीका अर्जुनकुमार सिंहलाई उम्मेदवार बनाउने निर्णय गरेको छ । बागमतीबाट महिलातर्फ दोलखाकी रोचकुमारी चौलागाईं, अन्यबाट चितवनका त्रिलोचन निर्मल पौडेल, अल्पसंख्यक/अपांगता भएकाबाट काठमाडौंका विवेक देवकोटा र दलिततर्फ धादिङका धु्रबराज विश्वकर्मा उम्मेदवार बनाउने भएको छ ।

गण्डकीमा महिलातर्फ गोरखाकी सम्झना देवकोटा, अन्यतर्फ स्याङ्जाका चक्रबहादुर पराजुली र अल्पसंख्यक तथा अपांगता तर्फबाट मुस्ताङका हेमचन्द्र शेरचन उम्मेदवार छन् । लुम्बिनीमा महिलातर्फ दाङकी तुलसाकुमारी केसी र अन्यतर्फ पाल्पाका झपेन्द्रबहादु घर्ती उम्मेदवार हुनेछन् ।

कर्णालीबाट महिलातर्फ हुम्लाकी विमलाकुमारी शाही, अन्यतर्फ मुगुका डिल्लीप्रसाद भट्ट र दलिततर्फ दैलेखका हिक्मत विक र सुदूरपश्चिममा महिलातर्फ कैलालीकी सावित्रादेवी घिमिरे, अन्यतर्फ कञ्चनपुरका ईश्वरीप्रसाद खरेल र अल्पसंख्यक तथा अपांगतातर्फ कैलालीका रामचन्द्र जोशी उम्मेदवार बन्ने भएका छन् ।

१९ सिटका लागि हुने राष्ट्रियसभा निर्वाचनका लागि भोलि मनोनयन दर्ता हुँदैछ । फागुन २० गते राष्ट्रिय सभाका २० सांसदहरूको पदावधि सकिँदैछ । एक जना भने राष्ट्रपतिले मनाेनयन गर्ने व्यवस्था छ । प्रतिनिधिसभा निर्वाचनमा पराजित भएकी राष्ट्रिय जनमोर्चाकी नेतृ दुर्गा पौडेललाई राष्ट्रपतिले मनोनीत गर्ने कोटाबाट राष्ट्रिय सभामा लैजाने सत्ता गठबन्धन विच सहमति भएको छ ।

गत निर्वाचनमा प्यूठानमा नेकपा एमालेका सूर्य थापासँग भारी मतले पराजित नेकपा मसालकी पौडेललाई विज्ञको कोटाबाट राष्ट्रिय सभामा लैजाने सहमति सत्ता गठबन्धनका नेताहरुले गरेका हुन् ।