काठमाडौं । मुलुक बर्बाद हुनबाट जोगाउन केही समयभित्र सशक्त आन्दोलनमा उत्रनुपर्ने अवस्था सिर्जना भइरहेको नेकपा एमालेका अध्यक्ष केपी शर्मा ओलीले बताएका छन् । देशको अवस्था अहिलेजस्तो खराब कहिले पनि नभएको जिकिर गर्दै ओलीले मुलुक बचाउन  सशक्त आन्दोलनमा उत्रनुपर्ने बताएका हुन् ।

एमाले केन्द्रीय कमिटीमा मनोनीत सदस्यहरूकाे पद तथा गोपनीयताको शपथ ग्रहण गराउँदै अध्यक्ष ओलीले नेपाली समाज, राजनीति, अर्थतन्त्र, संस्कृति हरेक क्षेत्रमा आक्रमण भइरहेको चर्चा गर्दै सामाजिक सद्भाव र राष्ट्रिय एकता कायम गर्दै राष्ट्र जोगाउने पक्षमा भूमिका निर्वाह गर्नुपर्ने अवस्था रहेको बताए । मुलुकमा धार्मिक विद्वेष फैलाउने र पहिचानका नाममा राजनीति भाँड्ने काम भइरहेको उनकाे भनाइ छ ।

अध्यक्ष ओलीले विद्युत व्यापार, देशको भू–भागको रक्षा लगायतका विषयमा वर्तमान गठबन्धन सरकार छिमेकीका लागि कम्फर्टेवलमात्र नभई घुँडाटेकुवा, दलाल र आत्मसमर्पणवादी भएको जिकिर गरे । पार्टीभित्र अराजकता र अनुशानहीनता जस्ता कुरा स्वीकार्य नहुने स्पष्ट गर्दै आगामी २०८१ पार्टीका लागि शुद्धीकरण र सुदृढीकरणको वर्ष हुने बताए ।

अध्यक्ष ओलीले २६औं सचिवालय बैठकबाट मनोनीत छ जना केन्द्रीय कमिटी सदस्यहरूलाई आज पार्टी कार्यालय, च्यासलमा शपथ गराए । शपथ ग्रहण गर्नेहरूमा दामोदर भण्डारी, विनोद शाह, केशव पाण्डे, रामऔतार यादव, तुलसी न्यौपाने र दीपक कार्की छन् । भण्डारी, शाह, पाण्डे, यादव र न्यौपाने निवर्तमान प्रदेश कमिटीका अध्यक्ष हुन् भने कार्की झापा जिल्ला अध्यक्ष थिए ।