काठमाडौं । आफुलाई टिचिङ अस्पतालकाे डाक्टर भनि परिचय दिँदै अर्काकाे नेपाल मेडिकल काउन्सिलकाे नम्बर प्रयाेग गर्दै बिरामी जाँच्ने एक जनालाई प्रहरीले पक्राउ गरेकाे छ ।

काठमाडौं उपत्यका अपराध अनुसन्धान कार्यालयले मोरङ विराटनगर उपमहानगर-२ घर भई काठमाडौं-३ महाराजगञ्ज बस्ने ४० वर्षीय सम्बुद्ध भट्टाचार्यलाई नक्कली डाक्टर बनी बिरामी जाँचेकाे आराेपमा पक्राउ गरी सार्वजनिक गरेकाे हाे ।

डा. एस भट्ट आचार्य भन्ने सम्बुद्ध भट्टाचार्यले काठमाडौंको बसुन्धारास्थित धौवलागिरी हिमाल पोलिक्लिनिकमा इन्डोग्रिनोलोजी कन्सल्टेन्टको रूपमा काम गर्ने गरेका थिए ।

कार्यालयका प्रवक्ता एसपी रवीन्द्र रेग्मीका अनुसार भट्टाचार्यले नक्सालमा रहेको वी केयर पोलिक्लिनिकमा समेत काम गर्ने गरेका थिए । उनले उक्त पोलिक्लिनिकमा ९ महिना काम गरी करिब ६३० बिरामीको उपचार समेत गरेकाे पाइएको छ । क्लिनिकमा उपचार गराएबापत उनले ७५० रुपैयाँ लिने गरेको खुलेको प्रवक्ता एसपी रेग्मीले बताए ।

भट्टाचार्यले धवलागिरी पाेलिक्लिनिकमा प्रति बिरामी ५ सय रूपैंया लिँदै ४० जनाभन्दा बढी बिरामीकाे उपचार गराएको खुलेको छ । चीनबाट एमबिबिएस पढेको दाबी गरेका भट्टाचार्यले नेपाल मेडिकल काउन्सिल नम्बर पनि अरूकाे नै प्रयाेग गरिरहेकाे खुलेकाे छ । उनले प्रयाेग गरेकाे एनएमसी नम्बर ९६७० गाेखराकी एक एमबिबिएस डाक्टरकाे हाे ।

चीनबाट एमबिबिएस उत्तिर्ण गरेकाे प्रमाण माग गर्दा भट्टाचार्यले देखाउन नसकेको अनुसन्धान अधिकृत प्रहरी निरीक्षक निर्मलकुमार थापाले बताए ।  ‘चीनबाट पढेको भनेर भन्नुभएको छ । तर प्रमाणपत्र देखाउनुस् भन्दा देखाउन सक्नुभएको छैन, टिचिङ अस्पतालमा काम गर्ने गरेको पनि भन्दै हिँड्नुहुन्छ । तर त्यस्तो गरेको पाइएन ।’ प्रहरी निरीक्षक थापाले भने ।

उनीबाट विभिन्न विश्व स्वास्थ्य संगठनकाे नक्कली प्रमाणपत्र, वीपी काेइराला स्वास्थ्य विज्ञान प्रतिष्ठानका तत्कालिन उपकुलपति डा. ज्ञानेन्द्र गिरीले दिएकाे पत्र लगायत कागजातहरू पनि बरामद गरिएकाेमा ती सबै नक्कली भएको प्रहरीले बताएकाे छ । उनी सँगबाट नेपाल चिकित्सक संघ र टिचिङ अस्पतालको कार्ड फेला परेको छ । भने, विभिन्न संस्थाकाे नाम भएकाे प्रशंसापत्र, प्रमाणपत्र समेत फेला परेकाे छ ।

उनीबाट पूर्वस्वास्थ्य मन्त्री एवं जनता समाजवादी पार्टीका अध्यक्ष उपेन्द्र यादवको हस्ताक्षर भएको नक्कली प्रशंसा पत्र पनि प्रहरीले बरामद गरेको छ । ‘विभिन्न संस्थाको नाम प्रयोग गरिएका प्रशंसापत्र, प्रमाणपत्र र अन्य कागजातहरू र पूर्वमन्त्री उपेन्द्र यादवको हस्ताक्षर समेत भएको प्रमाणपत्र बरामद गरेका छाैं ।’ उनले विदेश जानेहरूको मेडिकल रिपोर्ट समेत बनाउने गरेको भन्दै प्रहरी निरीक्षक थापाले भने ।

प्रहरीले उनीविरूद्ध इलाजसम्बन्धी कसुर र नक्‍कली कागजात खडा गरेको भन्दै लिखतसम्बन्धी कसुरमा अनुसन्धान अघि बढाएको छ । उनले कन्सल्टेन्ट डाक्टर बनी करिब ३ वर्षदेखि बिरामी जाँच गरिरहेकाे अनुसन्धानमा खुलेकाे छ ।