काठमाडौं । बिहीबार सम्पन्न निर्वाचन पछि नेकपा माओवादी केन्द्र राष्ट्रिय सभामा सबैभन्दा ठूलो दल बनेको छ । १९ सिटका लागि भएको  निर्वाचनमा नेपाली कांग्रेसका १० जना निर्वाचित भएपनि माओवादी केन्द्र ठूलाे दल बनेकाे छ ।

निर्वाचनमा माओवादी केन्द्रका ५, एकीकृत समाजवादीका २ तथा जनता समाजवादी पार्टी र नेकपा एमालेका १-१ जना निर्वाचित भए । माओवादीबाट हाल उपाध्यक्षसहित १५ जना राष्ट्रिय सभामा रहेकाेमा ३ जना फागुन २० बाट बिदा हुँदा पनि निर्वाचनबाट ५ जना थपिएकाले १७ सिटसहित सबैभन्दा ठूलो दल भएको हो ।

राष्ट्रिय सभामा कांग्रेसका १० सांसद रहेकामा ४ जना फागुन २० गते बिदा हुँदा ६ जना मात्र बाँकी रहन्छन् । बिहीबार १० जना थपिएपनि राष्ट्रिय सभामा कांग्रेस १६ सिटसहित दोस्रो ठूलो दल बन्नेछ ।

हाल सबैभन्दा ठूलो दल रहेपनि अब राष्ट्रिय सभामा एमाले तेस्रो दल हुनेछ ।  पदावधि पूरा हुने राष्ट्रिय सभाका २० सदस्यमध्ये एमालेका मात्रै ९ जना छन् । त्यसमध्ये पनि एक जना राष्ट्रपतिले मनोनीत गरेकाेले उसकाे सांसद संख्या घटेकाे छ । फागुन २० पछि राष्ट्रिय सभामा एमाले १० सिटसहित तेस्रो दलमा रहनेछ ।

एकीकृत समाजवादी र जसपालाई कुनै घाटा भएन । एकीकृत समाजवादीका ८ जना सांसद मध्ये दुई जना फागुनबाट बिदा भएपनि नयाँ दुई जना पुनः निर्वाचित भएकाले उसको संख्या कायमै रहनेछ । जसपाकी प्रमिलाकुमारी यादव पदावधि सकिएपनि बिहीबार एक जना निर्वाचित भएर आएका छन् ।

यता, राष्ट्रपतिबाट मनोनित विमला राई पौड्यालको ठाउँमा जनमोर्चाकी दुर्गा पौडेललाई ल्याउने सत्ता गठबन्धनको समझदारी छ । अब राष्ट्रिय सभामा जनमोर्चाका दुई सांसद हुनेछन् । लोकतान्तिक समाजवादी पार्टीकाे पनि एक जना सांसद राष्ट्रिय सभामा छन् ।