माधब काफ्ले

माेरङ । नेपाली कांग्रेसका कृष्णप्रसाद सिटौलाले कठिन परिस्थितिका बीच राष्ट्रियसभा सदस्य निर्वाचनमा बाजी मारे । सत्तारूढ गठबन्धनकै महिला उम्मेदवार पराजित हुने परिस्थितिबीच सिटौला निर्वाचित हुनुलाई धेरै आश्चर्य मानेका छन् ।

कोशी प्रदेशमा राष्ट्रियसभाको दुई सिटका लागि भएको निर्वाचनमा चार जनाले चुनावी प्रतिस्पर्धा रोजेका थिए । जसमध्ये, कांग्रेसका पूर्वमहामन्त्री समेत रहेका सिटौलाले राप्रपाका उद्धव पौडेललाई हराए ।
 
राप्रपासँग सहकार्य गरेर नेकपा एमालेले सिटौलालाई रोक्ने दाउ बनाएको थियो । तर, कांग्रेसका नेता–कार्यकर्ताको साथ र गठबन्धन दलहरूको सहयोगमा सिटौला विजयी भए ।

सिटौलालाई जित्ने माहोल बनाउनका लागि साथ दिने नेता–कार्यकर्ताबीचका एक हुन्, अभिषेक गिरी । पछिल्लो समय समाजसेवामा सक्रिय देखिएका गिरिले राष्ट्रियसभा निर्वाचनका बेला गरेको दौडधुपले सिटौलाको जित अझ सहज बनेको बताइन्छ । गिरी स्वयम् भन्छन्, ‘राम्रो व्यक्तिले राष्ट्रियसभा स्थान पाउनुभएको छ । उहाँलाई हामीले सक्दो सहयोग गरेका हौँ । कठिन अवस्थाकाबीच सबै मिलेर उहाँलाई उकास्यौं । धेरै खुसी छु ।’

माओवादीलाई शान्ति प्रक्रियामा ल्याउन भूमिका निर्वाह गरेका सिटौला करिब एक दशक लगभग शक्तिविहीन थिए । तर, अहिले पुनः सत्ता–शक्तिमा ल्याउन माओवादीलगायत गठबन्धन दलको समर्थन रह्यो ।

कांग्रेस सभापति शेरबहादुर देउवानिकट मानिने सिटौलालाई संस्थापन इतर (डा. शेखर कोइराला) पक्षले असहयोग गर्ने शंका थियो । तर, गिरीलगायत केही नेताका कारण कोइरालामात्र नभएर कांग्रेसका महामन्त्रीद्वय गगन थापा र विश्वप्रकाश शर्माले खुलेरै समर्थन गरे । जसका कारण पनि उनको जित सुनिश्चित भयो ।

सिटौलाले आफ्ना निकटतम् प्रस्तिपर्धी राप्रपाका पौडेललाई सात सय ३० मतान्तरले पराजित गरेका हुन् । पौडेलले कुल ४ हजार पाँच सय ६२ मत ल्याउँदा कांग्रेसका सिटौलाले पाँच हजार दुई सय ९२ मत ल्याए ।

सिटौलालाई प्रदेशसभाको ४५ जना र पौडेललाई ४७ जना सदस्यहरूले मतदान गरेका थिए । स्थानीय तहतर्फ सिटौलाले एक सय ५३ मत ल्याउँदा पौडेलले एक सय नौ जना पालिका अध्यक्ष–उपाध्यक्ष तथा प्रमुख–उप–प्रमुखको मत प्राप्त गरे ।

एमालेले राप्रपासँग गठबन्धन गरेको भए पनि पाैडेलले प्रदेशसभाको एक र स्थानीय तहको चार जनाको मत प्राप्त गरे । यो जितसँगै सिटौला ७७ वर्षको उमेरमा सत्ता–शक्तिमा पुनरागमन गर्न सफल भएका छन् । गत प्रतिनिधिसभा निर्वाचनमा झापा क्षेत्र नम्बर–३ बाट पराजित भएका सिटौलालाई राप्रपाका अध्यक्ष राजेन्द्र लिङ्देनले एमालेको सहयोग लिएर पराजित गरेका थिए ।

सिटौला त्यसअघि २०७४ को निर्वाचनमा पनि लिङ्देनसँग नै पराजित भएका थिए । संसद् प्रवेशमात्र नभएर राष्ट्रियसभाको अध्यक्षकै रूपमा उनको चर्चा छ । राष्ट्रियसभाको अध्यक्ष बनाउनकै लागि गठबन्धनले उनलाई जिताएको चर्चा छ ।