काठमाडाैं । पहिलोपल्ट नेपालका मनोविदले अन्तर्राष्ट्रिय बोर्डमा एडभान्स सर्टिफाइड अटिजम स्पेसलिस्टकाे मान्यता प्राप्त गरेका छन् । विगत दुई दशक भन्दा लामो अवधि अटिजम भएका बालबालिका तथा मनोविज्ञानको क्षेत्रमा सकृय वरिष्ठ मनोविद भगवती भट्टराईले एडभान्स सर्टिफाइड अटिजम स्पेसलिस्टको मान्यता प्राप्त गरेकी हुन् ।

लामो अवधिको अनुभव भएका विशेषज्ञहरूलाई अन्तर्राष्ट्रिय बोर्ड आइबीसीसीइएसले उच्चतम कोटीको क्षमता परीक्षण गरी एडभान्स सर्टिफाइड अटिजम स्पेसलिस्टको मान्यता प्रदान गर्छ । उक्त बोर्डले अमेरिकाका सरकारी अधिकारीहरू, विशेषज्ञहरूका साथ साथै संसारभर बाट मापदण्ड पूरा गर्नसक्ने विशेषज्ञहरूलाई प्रमाणित गर्दै आएको छ ।

यसअघि नेपाललाई मापदण्डमा नराखिएको तथा सम्बोधन नगरेको अवस्थामा नेपाल एकेडेमी अफ साइकोलोजीको पहलमा उक्त बोर्डले नेपाललाई सम्बोधन तथा आफ्नो मापदण्डमा समेत सामेल गरेको थियो ।

‘जसरी गायक धीरज राईले नेपाल र बुद्धभूमिलाई संसारभरि चिनाइरहेका छन् त्यसरी नै हामी विशेषज्ञहरुले समेत आआफ्नो क्षेत्रबाट राष्ट्रिय स्वार्थको संरक्षण गर्नुपर्छ । विश्वका कुनाहरूमा यस्ता धेरै क्षेत्रहरू छन् जहाँ नेपाल देश भनेर समेत चिनिएको र समेटिएको छैन, आफ्नो फाइदा गर्दै गर्दा आफ्नो माटोलाई समेत बिर्सनु हुँदैन । विदेशी भूमिमा आफ्नो राष्ट्रको स्वार्थ संरक्षण गर्ने कर्तव्य सबै नेपालीको हो ।’ नेपाल एकेडेमी अफ साइकोलोजीका अन्तर्राष्ट्रिय सम्बन्ध निर्देशक उपहारजंग शाह बताउँछन् ।

मनोविद भगवती भट्टराई नेपाल एकेडेमी अफ साइकोलोजीका अध्यक्ष समेत हुन् भने आफ्नाे २४ सै घण्टा अटिजम भएका बालबालिकाको थेरापी, शिक्षण, पालनपोषण तथा व्यवस्थापनमा बिताउँछिन् ।