नरदेवीमा केएमसीको निःशुल्क स्वास्थ्य शिविरबाट ६१३ जना लाभान्वित
काठमाडौं । सामाजिक उत्तरदायित्व अन्तरगत काठमाडौं मेडिकल कलेजले नरदेवीमा गरेको निःशुल्क स्वास्थ्य शिविरबाट ६१३ जना बिरामी लाभान्वित भएका छन् । बिहीबार केएमसीले काठमाडौं महानगरपालिका वडा नं. ८, लायन्स क्लब अफ काठमाडौं लालिगुरास, लायन्स क्लब अफ काठमाडौं डाँफेसँगको सहकार्यमा निःशुल्क स्वास्थ्य शिविर आयोजना गरेको हो ।
निःशुल्क स्वास्थ्य शिविरमा ४२ जनाको इसिजी, ८९ जनाको भिडियो एक्सरे, १०३ जनाको ल्याब परीक्षण गरिँदा ३२ जनाको दाँत समेत खोलिएको केएमसीका जनरल मेनेजर नारायण दाहालले जानकारी दिए । उनका अनुसार शिविरबाट ३३ जनालाई थप उपचारका लागि रेफर गरिएको छ । रेफर गरिएका बिरामीहरुलाई केएमसीले उपचारमा विभिन्न छुटहरु दिनेछ ।
शिविरमा जनरल फिजिसियन, प्रसुति तथा स्त्री रोग, बाल रोग, जनरल सर्जरी, यौन तथा चर्म रोग, हाडजोर्नी तथा नसा रोग, आँखा रोग र दन्त रोग सम्बन्धी सेवाहरु दिइएको थियो ।
केएमसीका सेवाहरु जनताका घरघर पुर्याउने अभिप्रायले तत्कालिन कार्यकारी अध्यक्ष हाल प्रतिनिधि सभाका सांसद डा.सुनिलकुमार शर्माले निःशुल्क स्वास्थ्य शिविरको थालनी गरेका थिए । उनको अभियानबाट दूरदराजमा रहेका गरिब, विपन्न, अशक्त नागरिक बढी लाभान्वित भइरहेकाले नियमित रुपमा निःशुल्क स्वास्थ्य शिविर चलाईरहेको केएमसीकी कार्यकारी अध्यक्ष सोइना शर्माले बताइन् ।
0 प्रतिकृया