सांसद सुनिल शर्माको स्वास्थ्य शिविर बुढानिलकण्ठमा, ६२१ जनाको स्वास्थ्य जाँच
काठमाडौं । नेपाली कांग्रेसका सांसद सुनीलकुमार शर्माको निःशुल्क स्वास्थ्य शिविर काठमाडौंको बुढानिलकण्ठमा गरिएको छ । काठमाडौं मेडिकल कलेजका विशेषज्ञ चिकित्सकको टोलीले बुढानिलकण्ठ नगरपालिका वडा नं. १ मा निःशुल्क स्वास्थ्य शिविर सञ्चालन गरेको हो ।
स्थानीय ओम स्कुलमा कम्युनिकेशन नेपालसँगको सहकार्यमा गरिएको निःशुल्क स्वास्थ्य शिविरमा ६२१ जनाको निःशुल्क स्वास्थ्य परीक्षण गरिएको केएमसीका जनरल मेनेजर नारायण प्रसाद दाहालले जानकारी दिए । दाहालका अनुसार शिविरमा ४५ जनाको ईसीजी, ८९ जनाको ल्याब परीक्षण र ९८ जनाको भिडियो एक्सरे गरिएको थियो ।
त्यस्तै २२ जनाको दाँत खोलिएको र ३२ जना बिरामीलाई थप उपचारका लागि ओ.टी. रेफर गरिएको छ । शिविरमा नाक कान घाँटी, स्त्री तथा प्रसुति, जनरल मेडिसिन, नसा तथा हाडजाेर्नी, बाल राेग, दन्त राेग लगायतका सेवाहरू प्रदान गरिएकाे छ ।
डाक्टर सुनिल कुमार शर्माले सामाजिक भावनाले निःशुल्क स्वास्थ्य शिविर सञ्चालन गर्दै आइरहेका छन् । उनले सामाजिक उत्तरदायित्व अन्तर्गत देशका विभिन्न भागमा निःशुल्क स्वास्थ्य शिविर गर्दै आइरहेका हुन् । डा. शर्माको शिविरबाट सहरदेखि दुरदराजमा रहेका जनताहरुले स्वास्थ्य सेवा पाइरहेका छन् ।
0 प्रतिकृया