काठमाडौं । सांसद सुनिलकुमार शर्माको स्वास्थ्य टोली सुदुरपश्चिमको डोटीको दिपायल पुगेको छ । काठमाडौं मेडिकल कलेजका विशेषज्ञ चिकित्सकहरु सम्मिलित निःशुल्क स्वास्थ्य शिविरको टोली लिएर सांसद शर्मा दिपायल पुगेका हुन् ।

आज दिपायलको सिलगढी नगरपालिकाको दिल्पेश्वर माध्यामिक विद्यालयमा आयोजित बृहद् निःशुल्क स्वास्थ्य शिविरमा १७०५ जनाको निःशुल्क उपचार गरिएको छ । शिविरबाट उक्त नगरपालिकाका महिला, बालबालिका, ज्येष्ठ नागरिक, गरिब, विपन्न समुदायका नागरिक बढी लाभान्वित भएको केएमसीका जनरल मेनेजर नारायण प्रसाद दाहालले जानकारी दिए । शिविरमा १०३ जनाको इसिजी, २११ जनाको ल्याब परीक्षण, १९५ जनाको भिडियो एक्सरे गरिएको छ । भने, शिविरमा आएका मध्ये ६५ जनाको इको समेत गरिएको केएमसीका जनरल मेनेजर दाहालले जानकारी दिए ।

शिविरबाट थप उपचारका लागि ५७ जनालाई ओ.टी. रेफर गरिएको छ । शिविरमा विद्यालयका विद्यार्थीहरुसँगै नगरपालिकाका महिला तथा ज्येष्ठ नागरिकको बढी सहभागिता रहेको थियो ।

दिपायल सिलगढी नगरपालिकाका प्रमुख विजय खड्काको सभापतित्वमा आयोजित निःशुल्क स्वास्थ्य शिविरको उद्घाटन सांसद डाक्टर शर्माले गरेका थिए । सो अवसरमा बोल्दै सांसद शर्माले जनतालाई निःशुल्क स्वास्थ्य सेवा प्रदान गर्न शिविर ल्याइएको बताए । शिविरबाट थप उपचारकालागि रेफर भएका बिरामीको उपचारमा सांसद शर्माले सहयोग गर्ने प्रतिबद्धता जनाए ।

कार्यक्रममा केएमसीका जनरल मेनेजर नारायणप्रसाद दाहालले जनतालाई सर्वसुलभ तवरले गुणस्तरीय स्वास्थ्य सेवा प्रदान गर्न कलेज लागि परेको बताउँदै अस्पतालबाट प्रदान गरिने स्वास्थ्य सेवाबारे जानकारी गराए । समाजसेवी सुवास पोखरेलले नेपालको पूर्वी भेगमा जन्मिए पनि देशका कुना कन्दराका जनतालाई सेवा गरिरहेका सांसद शर्माको मुक्त कण्ठले प्रसंसा गर्दै राजनीति गर्नेहरुले सांसद शर्माको कार्यशैलीबाट सिक्नुपर्ने बताए ।