काठमाडौं । गाउँगाउँमा निःशुल्क स्वास्थ्य शिविर चलाउँदै जनताको सेवामा सक्रिय नेपाली कांग्रेसका सांसद डाक्टर सुनिल कुमार शर्माको निःशुल्क स्वास्थ्य शिविर ललितपुरको गोदावरीमा पुगेको छ । काठमाडौं मेडिकल कलेजका स्वास्थ्यकर्मी सम्मिलित डा. शर्माको निःशुल्क स्वास्थ्य शिविर ललितपुरको गोदावरी नगरपालिका वडा नं. ७ मा भएको हो । 

शिविरमा ६२१ जना बिरामीाको निःशुल्क स्वास्थ्य जाँच गरिएको केएमसीका जनरल मेनेजर नारायण दाहालले जानकारी दिए । शिविरमा ८७ जनाको इसिजी, १०३ जनाको ल्याब परीक्षण, ९७ जनाको भिडियो एक्सरे गरिएको जनरल मेनेजर दाहालले जनाए । उनका अनुसार शिविरमा १७ जनाको दाँत खोलिएको थियो भने, थप उपचारका लागि २२ जनालाई ओटी रेफर गरिएको छ । 

शिविरमा आँखा रोग, नाक, कान घाँटी, दन्त रोग, स्त्री रोग, जनरल मेडिकल, जनरल सर्जरी, हाडजोर्नी तथा नसा र छाला रोगसम्बन्धी विशशेषज्ञ चिकित्सकले सेवा दिएका थिए । शिविर गोदावरी नगरपालिका ७ र ज्येष्ठ नागरिक चौतारी गोदावरी न.पा. १२सँगको सहकार्यमा सञ्चालन गरिएको हो । 

केएमसीका सञ्चालक समेत रहेका नेपाली कांग्रेसका प्रभावशाली नेता सांसद डा. शर्माले अस्पतालको स्वास्थ्य सेवालाई गाउँगाउँ पुर्याउन र जनतालाई सेवा दिन निःशुल्क स्वास्थ्य शिविर सञ्चालन गरेका हुन् । डा. शर्माको समाजसेवा र स्वास्थ्य सेवाबाट लाखौं जनता लाभान्वित भइरहेका छन् ।