काठमाडौं । नेपाल मेडिकल कलेज (एनएमसी)ले गोकर्णेश्वर नगरपालिका वडा नं. ६ स्थित सर्वेश्वर शहरी स्वास्थ्य केन्द्रमा निःशुल्क दन्त शिविर सञ्चालन गरेको छ । सामाजिक उत्तरदायित्व अन्तरगत कलेज अफ डेण्टल साइन्सेस एण्ड अस्पतालले निःशुल्क स्वास्थ्य शिविर सञ्चालन गरेको हो । 

शिविरमा एक सय जनाको निःशुल्क दन्त परीक्षण गरिएको कलेजले जनाएको छ । शिविरमा दन्त परीक्षणसँगै दन्त स्वास्थ्य सम्बन्धी सचेतना समेत दिइएको थियो । दाँतको हेरचाह कसरी गर्ने ? दाँत तथा मुखलाई कसरी स्वस्थ राख्ने ? कस्तो खानपान गर्दा दाँत स्वस्थ रहन्छ ? दाँतका रोगहरु केके हुन् ? लगायतका बारेमा सचेतना दिइएको थियो । 

कलेजले आफ्ना स्वास्थ्य सेवालाई सर्वसुलभ बनाउँदै लैजाने लक्ष्य लिएर सामाजिक स्वास्थ्य सेवाहरु चलाईरहेको छ । विरगञ्जका सफल मेडिकल व्यवसायी वरिष्ठ सर्जन प्रा.डा. जैनुद्धिन अन्सारीको नेतृत्वमा कलेजको व्यवस्थापन आएसँगै नेपाल मेडिकल कलेजको स्वास्थ्य सेवालाई गुणस्तरीय, दक्ष जनशक्ति युक्त बनाइएको छ । कलेजले केही समय भित्रै अत्याधुनिक नयाँ डेण्टल भवन सञ्चालनमा ल्याउने तयारी पनि गरेको छ ।