काठमाडौं । नेपाली कांग्रेसका सांसद डाक्टर सुनिल कुमार शर्माको निःशुल्क स्वास्थ्य शिविरबाट १५१ जना बिरामी लाभान्वित भएका छन् । काठमाडौं मेडिकल कलेजका स्वास्थ्यकर्मीद्वारा गोकर्णेश्वर नगरपालिका सुन्दरीजलमा आयोजित निःशुल्क स्वास्थ्य शिविरमा स्वास्थ्य सेवा दिएका थिए । 

लायन्स क्लब अफ काठमाडौं सँगको सहकार्यमा वि.पी. संग्रहालयमा आयोजित शिविरमा केएमसीका सात जना स्वास्थ्यकर्मीको टोलीले बिरामीको स्वास्थ्य जाँच गरेको केएमसीका प्रमुख प्रशासकीय अधिकृत तथा जनरल मेनेजर नारायण दाहालले जानकारी दिए । शिविरमा सुगर तथा प्रेसरको परीक्षणसँगै सामान्य स्वास्थ्य जाँच गरिएको थियो । 

वी.पी. जयन्तिको अवसर पारेर आयोजित निःशुल्क स्वास्थ्य शिविरमा नेपाली कांग्रेसका महामन्त्री विश्वप्रकाश शर्मा लगायतको स्वास्थ्य परीक्षण गरिएको थियो । सांसद शर्माले सर्वसाधारणलाई घरदैलोमै निःशुल्क स्वास्थ्य सेवा उपलब्ध गराउन निःशुल्क स्वास्थ्य शिविर सञ्चालन गर्दै आइरहेका छन् । शिविरबाट हालसम्म लाखौं जनता लाभान्वित भइसकेका छन् ।