काठमाडौं । नेपाली कांग्रेसका सांसद सुनिल कुमार शर्माको निःशुल्क स्वास्थ्य टोलीले मकवानपुरको इन्द्र सरोवर गाउँपालिका फाकेल, चलेखमा निःशुल्क स्वास्थ्य शिविरको आयोजना गरेको छ । इन्द्र सरोवर गाउँपालिका वडा नं. ५ को आयोजना, काठमाडौं सक्रिय युवा समुहको समन्वय र काठमाडौं मेडिकल कलेजका प्राविधिक सहयोगमा निःशुल्क स्वास्य शिविर आयोजना गरिएको थियो । 

शिविरमा ६ सय ४८ जना बिरामीको निःशुल्क स्वास्थ्य परीक्षण गरिएको काठमाडौं मेडिकल कलेजका प्रमुख प्रशासकीय अधिकृत तथा जनरल मेनेजर नारायण दाहालले जानकारी दिए । कालिदेवी माध्यामिक विद्यालय फाकेल ७ मा सम्पन्न निःशुल्क स्वास्थ्य शिविरमा सो क्षेत्रमा महिला, बालबालिका, ज्येष्ठ नागरिक तथा विपन्न समुदायले बढी लाभ लिएको दाहालले बताए । 

शिविरमा ११५ जनाको भिडियो एक्सरे, ८४ जनाको इसिजी गरिएको र २९ जनाको दाँत निकालिएको छ । शिविरमा उपचारार्थ आएका ४२ जना बिरामीलाई थप उपचारका लागि केएमसी रेफर गरिएको छ । शिविरमा जनरल मेडिकल, स्त्री रोग, बाल रोग, हाडजोर्नी तथा नसा रोग, नाक कान घाँटी, दन्त रोग, आँखा रोगसँगै सामान्य सल्यक्रियाको सेवा दिइएको थियो । 

गरिब, विपन्न तथा दुर्गम क्षेत्रमा रहेका नागरिकलाई गाउँघरमै निःशुल्क स्वास्थ्य सेवा दिने उद्देश्यले सांसद डा. शर्माले निःशुल्क स्वास्थ्य शिविर सञ्चालन गर्दै आइरहेका छन् । शिविरबाट हालसम्म लाखौं नागरिक लाभान्वित भएको केएमसीले जानकारी दिएको छ ।