काठमाडौं । सांसद सुनिल शर्माले सञ्चालन गर्नुभएको निःशुल्क स्वास्थ्य शिविरले सप्तरीको तिलाठी, कोइलाडीमा ९०३ जना बिरामीको निःशुल्क उपचार गरेको छ । काठमाडौं मेडिकल कलेज र नोवेल शिक्षण अस्पतालका स्वास्थ्यकर्मी सम्मिलित स्वास्थ्य शिविरमा महिला, बालबालिका, ज्येष्ठ नागरिकको स्वास्थ्य उपचार गरिएको हो । 

शिविरमा १७३ जनाको भिडियो एक्सरे, ८३ जनाको इसिजी, ८१ जनाको ल्याब परीक्षण, २३ जनाको इको गरिएको केएमसीका प्रबन्धक तथा प्रमुख प्रशासकीय अधिकृत नारायण दाहालले जानकारी दिनुभयो । शिविरबाट शल्यक्रियाका लागि ६० जनालाई रेफर गरिएको छ । रेफर गरिएका बिरामीहरुलाई केएमसीमा १०० प्रतिशत र नोवेलमा ५० प्रतिशत छुटमा उपचार गर्ने व्यवस्था सांसद डा. शर्माले मिलाएका छन् । 

नेपाली कांग्रेसका सांसद डा. शर्माले जनतालाई सर्वसुलभ रुपमा स्वास्थ्य सेवा पुर्याउने उद्देश्यले पूर्वमेची देखि पश्चिम महाकालीसम्म निःशुल्क स्वास्थ्य शिविर चलाउँदै आइरहनु भएको छ ।