काठमाडाैं । निजी मेडिकल तथा डेन्टल कलेजहरुको संस्था 'एसोसिएशन अफ प्राइभेट मेडिकल एण्ड डेन्टल कलेज अफ नेपाल'ले निजी मेडिकल कलेजमा अध्ययनरत आवासीय चिकित्सकलाई सरकारी सरह (आठौँ तह) को निर्वाह भत्ता दिने सरकारकाे निर्णय अस्वीकार गरेको छ । 

आयोगको उक्त निर्णयमा असहमती जनाउँदै निजी मेडिकल तथा डेन्टल कलेजहरुको संस्था एसोसिएशन अफ प्राइभेट मेडिकल एण्ड डेन्टल कलेज अफ नेपालले शनिबार विज्ञप्ति जारी गर्दै सरकारले आवासीय चिकित्सकहरूसँग गरेकाे सहमति कार्यान्वयन गर्न नसक्ने जनाएकाे हाे । 

गत शुक्रबार प्रधानमन्त्री केपी शर्मा ओलीको अध्यक्षतामा बसेको चिकित्सा शिक्षा आयोगको १६ औं बैठकले निजी मेडिकल कलेजमा अध्ययनरत आवासीय चिकित्सकलाई सरकारी आठौं तहका मेडिकल अधिकृत सरह निर्वाह भत्ता उपलब्ध गराउने निर्णय गरेको थियो । 

एसोसिएशनका अध्यक्ष प्रा.डा. ज्ञानेन्द्रमान कार्कीद्वारा जारी विज्ञप्तीमा शुक्रबार बसेको चिकित्सा शिक्षा आयोगको पूर्ण बैठकले गरेका निर्णयमा आफ्नो तर्फबाट 'नोट अफ डिसेन्ट'  समेत रहेको जानकारी जनाउँदै स्रोत सुनिश्चित नभइ स्नातकोत्तर तहका शैक्षिक कार्यक्रम सञ्चालन गर्न नसक्ने उल्लेख गरिएको छ । 

‘स्नातकोत्तर तहका शैक्षिक कार्यक्रम सञ्चालन गर्न सक्ने स्रोत सुनिश्चित नभई आठौं तह बराबरको निर्वाह भत्ता सहित स्नातकोत्तर अध्यापन गराउन नसकिने विषय पुन स्मरण गराउन चाहन्छौँ ।’  विज्ञप्तीमा भनिएको छ । 

माघ १४ गते शिक्षामन्त्री विद्या भट्टराई र स्वास्थ्य तथा जनसंख्या मन्त्री प्रदिप पौडेलले पहिलो वर्ष २५ हजार, दोस्रो वर्ष ३० हजार र तेस्रो वर्ष ३५ हजारको दरले निर्वाह भत्ता दिने, दुई वर्षे बोन्ड गरेको अवस्थामा सरकारी अधिकृत सहित तहको भत्ता दिने निर्णय गरेकाेमा निजी मेडिकल कलेजले समर्थन गरेका थिए । तर, विद्यार्थीहरुले असहमति जनाएर आन्दोलन गरेपछि अर्काे निर्णय भएपछि निजी मेडिकल कलेजहरूले असहमति जनाएका हुन् ।