काठमाडाैं । नेपाली कांग्रेसका युवा नेता तथा सांसद डा. सुनिल शर्माले हुम्ला जिल्लाको अत्यन्तै दुर्गम गाउँकी देबिसरा रावलको काठमाडौं मेडिकल कलेज (केएमसी) मा निःशुल्क मिर्गौला प्रत्यारोपण गरिदिने घोषणा गरेका छन् ।

हुम्ला जिल्लाका सांसद तथा माओवादी केन्द्रका नेता छिरिङ डम्डुल लामा र बिरामीका श्रीमान् हर्क बहादुर रावलले डा. शर्मासँग भेट गरेपछि उनले निःशुल्क उपचार गरिदिने प्रतिबद्धता जनाएका हुन् । साथै, उनले बिरामीको औषधि खर्चका लागि एक लाख रुपैयाँसम्म सहयोग गर्ने पनि बताएका छन् ।

देबिसरा रावललाई अस्पताल ल्याउन थानकोटस्थित उनको निवासमा एम्बुलेन्स पठाई काठमाडौं मेडिकल कलेज (केएमसी) मा उपचारको प्रक्रिया सुरु गरिएको छ । यस क्रममा बिरामीका श्रीमान् हर्क बहादुर रावलले डा. शर्मा आफूहरूका लागि भगवान सरह भएको बताएका छन् ।

सांसद शर्माले नेपालको सुदूरपूर्वदेखि सुदूरपश्चिमसम्म विभिन्न निःशुल्क स्वास्थ्य शिविर सञ्चालन गर्दै लाखौं गरिब तथा विपन्न नागरिकलाई सेवा प्रदान गर्दै आएका छन् । स्वास्थ्य शिविरमा सम्भव नभएका बिरामीहरूको लागि उनले काठमाडौं मेडिकल कलेज र नोबेल मेडिकल कलेजमा निःशुल्क उपचारको व्यवस्था मिलाउँदै आएका छन् ।

त्यसैगरी, उनले नोबेल मेडिकल कलेजमा आफ्नो निर्वाचन क्षेत्रका जनताका लागि जुनसुकै पार्टीका भएपनि निःशुल्क क्याबिनको व्यवस्था मिलाएका छन् । साथै, काठमाडौं सिनामंगलस्थित काठमाडौं मेडिकल कलेजमा पनि आर्थिक अवस्था कमजोर भएका बिरामीहरूको निःशुल्क उपचार गर्दै आएका छन् ।

सांसद शर्मा प्रतिनिधिसभाको एकमात्र तलब भत्ता नलिने सांसद रहेका छन् । डा. शर्माको यो महान कार्यले स्वास्थ्य सेवाबाट वञ्चित नागरिकहरूलाई जीवनदान दिएको छ । यस्तो समाजसेवी पहलले धेरै नेपालीहरूलाई स्वास्थ्य सेवामा पहुँच पुर्‍याउन ठूलो योगदान पुर्‍याउने विश्वास गरिएको छ ।