काठमाडौं । नेपाली कांग्रेसका सांसद डाक्टर सुनिलकुमार शर्माको निःशुल्क स्वास्थ्य शिविरबाट कालिकोटमा १४ सय बढी जनताले स्वास्थ्य सेवा पाएका छन् । काठमाडौं मेडिकल कलेजको प्राविधिक सहयोगमा कालिकोटको शुभकालिका गाउँपालिकाको आयोजनामा भएको निःशुल्क स्वास्थ्य शिविरमा १४०३ जना बिरामीको स्वास्थ्य उपचार गरिएको हो । 

शिविरमा २१० जनाको भिडियो एक्सरे गरिएको तथा शिविरबाट थप उपचारका लागि ९९ जना बिरामीलाई ओ.टी. रेफर गरिएको केएमसीका प्रबन्धक तथा प्रमुख प्रशासकीय अधिकृत नारायण दाहालले जानकारी दिनुभयो । शिविरमा जनरल मेडिसिन, स्त्री रोग, हाडजोर्नी, नसा रोग सम्बन्धी चिकित्सकहरुले सेवा दिएका थिए । 

सांसद शर्माले दूरदराजमा रहेका जनतालाई गाउँघरमै स्वास्थ्य सेवा पुर्याउने अभिप्रायले निःशुल्क स्वास्थ्य शिविरको आयोजना गर्दै आइरहनु भएको छ । उहाँको स्वास्थ्य शिविरबाट देशभरका लाखौं गरिब, विपन्न नागरिकले सेवा पाइसकेका छन् ।