मोरङ । नेपाली कांग्रेसका नेता डा. शेखर कोइरालाले अहिलेको  संविधान भित्रै रहेर सबै समस्याको समाधान खोज्नुपर्ने बताएका छन् । मोरङको वुढिगंगा गाउँपालिका–१ मा निमार्ण गर्न लागिएको बुढिगंगा पार्कको शिलान्यास गर्दै उनले संविधानभित्र रहेर शान्तिपुर्ण आन्दोलन गर्ने अधिकार सबैलाई रहेको चर्चा गरे । 

कोइरालाले कुनै प्रकारको हिंसा, आतंक तोडफोड, आगजनी नेपाली कांग्रेसलाई स्विकार्य नहुने प्रष्ट पारे । नेता कोइरालाले गत शुक्रबार काठमाडौंकाे तीनकुनेमा भएको घटनाको निष्पक्ष छानविन गर्नुपर्नेमा समेत जोड दिए । 

नेपाली जनतालाई विश्वास दिलाउँन छानविन समिति बनाएर सो घटनाको जति सक्दो चाँडो सरकारले छानविन गर्नुपर्ने उनको भनाई थियो । उनले यो व्यवस्थालाई बलियो र दिगो बनाउन राजनीतिक दलहरु पनि सुध्रनु जरुरी रहेको बताए । उनले अहिलेको अवस्थामा राजनितिक दलहरुले आफुलाई सुर्धादै जनताका मन जित्न सक्नुपर्नेमा जोड दिए ।

नेता कोइरालाले नेपाली कांग्रेस र नेकपा एमाले दुई ठुला दल मिलेर सरकार निमार्ण गर्दा संविधान संशोधन, सुशासन, आर्थिक विकास, सुशासन तथा रोजगारी सृजना गर्ने कुरा गरेपनि त्यसो हुन नसेको जिकीर गरे । 

जति सक्दो चाँडो आफुले गरेको प्रतिबद्धता पुरा गर्ने तर्फ दलहरुको ध्यान जानुपर्ने कोइरालाको भनाई थियो । उनले नेपालमा कृषि, जलविद्युत, जडिवुटी तथा पर्यटनको प्रसस्त संभावना रहेकाले त्यस्को उचित सदुपयोग गरेर युवाहरुलाई स्वरोजगार बनाउँदै नेपाल नेपाली जनतालाई सुखी र समृद्ध बनाउन सकिने बताए ।