इटहरी । गढी गाउँपालिका अन्तर्गतका विभिन्न ८ विद्यालयका बालबालिकाहरूलाई लक्षित गर्दै ग्रामिण महिला उत्सुकता विकास मञ्च (फरवार्ड) द्वारा शैक्षिक सामग्री वितरण कार्यक्रम सम्पन्न गरिएको छ । चाइना फाउन्डेशन फर रूरल डेभलपमेन्ट नेपाल तथा न्यू लाइफ फाउन्डेशन नेपालकाे  आर्थिक सहयोगमा सञ्चालन गरिएको उक्त कार्यक्रममा कुल १२१६ जना विद्यार्थीलाई १२१६ वटा ब्याग वितरण गरिएको आयोजकले जनाएको छ ।

वितरण कार्यक्रम गढी गाउँपालिकाभित्रका ८ वटै विद्यालयमा छुट्टाछुट्टै रूपमा आयोजना गरिएको थियो । आयोजकका अनुसार स्थानीय आवश्यकता, पहुँच र विद्यार्थीहरूको प्रत्यक्ष सहभागीतालाई ध्यानमा राख्दै विद्यालयमै पुगेर सामग्री वितरण गरिएको हो ।

विशेषगरी, यो कार्यक्रम सुनसरी निर्वाचन क्षेत्र नं. ३ की पूर्व सांसद तथा पूर्व मन्त्री भगबती चौधरीको विशेष पहलमा सम्पन्न भएको हो । उहाँको सक्रिय पहल र समन्वयले कार्यक्रमलाई प्रभावकारी रूपमा कार्यान्वयन गर्न महत्त्वपूर्ण भूमिका खेलेको जनाइएको छ ।

कार्यक्रममा उहाँले ग्रामीण क्षेत्रका विद्यार्थीहरूको शैक्षिक स्तर अभिवृद्धि गर्न यस्ता सहयोगमुखी कार्यक्रम आवश्यक रहेको उल्लेख गर्दै राज्य, समाज र अन्तर्राष्ट्रिय साझेदारबीचको सहकार्यलाई अझ सुदृढ बनाउनु पर्नेमा जोड दिनुभयो । कूटनीतिक दृष्टिकोणबाट हेर्दा, यस्ता पहलहरूले स्थानीय समुदाय, राष्ट्रिय नेतृत्व र अन्तर्राष्ट्रिय सहयोगी संस्थाबीचको सम्बन्धलाई थप मजबुत बनाउने देखिन्छ । यस प्रकारको सहकार्यले तत्कालीन आवश्यकता सम्बोधनसँगै दीर्घकालीन विश्वास निर्माणमा समेत योगदान पुर्‍याउने अपेक्षा गरिएको छ ।

शैक्षिक सामग्री प्राप्त गर्ने विद्यालयहरूमा गढी गाउँपालिकाका वडा नं. १ का नन्द आधारभूत विद्यालय, चलाहा आधारभूत विद्यालय, गढी २ का सरस्वती माध्यमिक विद्यालय, गढदेव आधारभूत विद्यालय, जनता आधारभूत विद्यालय रहेका छन् । त्यस्तै, रामसीता आधारभूत विद्यालय गढी ३ , ग्रामधामी धमियेन आधारभूत विद्यालय गढी ४ र जनता माध्यमिक विद्यालय गढी ६ रहेका छन् ।

ग्रामीण महिला (फरवार्ड) ले यस्ता कार्यक्रमहरूले विद्यार्थीहरूको शैक्षिक पहुँच विस्तार गर्न तथा विद्यालयप्रति आकर्षण बढाउन महत्त्वपूर्ण भूमिका खेल्ने विश्वास व्यक्त गरेको छ । स्थानीय अभिभावक तथा शिक्षकहरूले पनि यस्तो सहयोगले विशेष गरी आर्थिक रूपमा कमजोर परिवारका बालबालिकालाई ठूलो राहत पुगेको बताएका छन् ।

यस प्रकारका सामाजिक सहकार्यमा आधारित कार्यक्रमहरूले ग्रामीण क्षेत्रमा शिक्षा सुधारमा सकारात्मक प्रभाव पार्ने अपेक्षा गरिएको छ । गढीमा सम्पन्न यो कार्यक्रम केवल सामग्री वितरणमा सीमित नभई सामाजिक समन्वय, उत्तरदायी नेतृत्व र विकासप्रतिको साझा प्रतिबद्धताको उदाहरणका रूपमा स्थापित भएको छ ।