सुनसरी । काेराेना महामारी र आर्थिक संकटका कारण गतवर्ष हुन नसकेकाे अन्तर्राष्ट्रिय आमन्त्रण बुढासुब्बा टुबोर्ग गोल्डकप फुटबल प्रतियोगिता याे वर्ष भने हुने भएकाे छ । आउँदाे चैत २६ गतेदेखि बुढासुब्बा गाेल्डकपको २३ औं संस्करण हुने आयाेजक धरान फुटवल क्लबले जनाएकाे छ ।

मंगलबार धरानमा पत्रकार सम्मेलन गर्दै क्लबले यहि चैत २६ देखि २०७९ बैशाख ३ सम्म प्रतियाेगिता हुने बताएकाे छ । कोरोना महामारीकाे जोखिम रहेपनि परिस्थिति न्युनिकरण हुँदै आएकाले स्वास्थ्य सुरक्षा मापदण्ड अपनाउँदै प्रतियोगिता हुनेछ । बुढासुब्बा गाेल्डकप फुटवल प्रतियाेगिता प्रदेश १ काे प्रतिष्ठित प्रतियाेगिता हाे ।

धरान फुटबल क्लबका अध्यक्ष किशोर राईले बाइस वर्ष देखी निरन्तर चल्दै आएको बुढासुब्बा गोल्डकपको इतिहासमा गतवर्ष कोरोनाका कारण प्रतियाेगिता गर्न नसकिएकाे जिकीर गरे । क्लबले सरकारी लगानी बिना स्थानीय साधन श्रोत जुटाएर ‘क’ श्रेणीको फुटवल प्रतियोगिता गर्न सफल भइरहेकाे जनाउँदै बुढासुब्बा गाेल्डकपकाे छुटै इतिहास भएको जिकीर पनि गरे । ‘जस्तो सुकै संकटको सामना गरेर भएपनि बुढासुब्बा फुटबल प्रतियाेगितालाई हामी निरन्तरता दिन्छौं । यसकाे छुट्टै इतिहास छ ।’

प्रारम्भिक तयारीका क्रममा २३ औं संस्करणकाे प्रतियाेगितामा दुइ भारतीय फुटबल टिम सहभागी गराइने गृहकार्य भैरहेको छ । शहिद स्मारक लिगमा भर्खरै उत्कृष्ट घोषित ३ क्लब, उपत्यका बाहिर मोफसलका २ र आयोजक धरान फुटबल क्लब समेत गरी ८ वटा टिम प्रतियोगितामा सहभागी हुने भनिएकाे छ ।

धरान उपमहानगरपालिकाले प्रतियोगिता आयोजना गर्न १८ लाख रुपैंया प्रदान गर्ने अध्यक्ष राईले जानकारी दिए । उनका अनुसार उक्त रकम विजेतालाई १० लाख रुपैंया, उपविजेतालाई ५ लाख रुपैंया वितरणमा खर्च गरिने छ । ३ लाख रुपैंया घरेलु टिम धरान फुटबल क्लबको टोलीलाई पूर्व अभ्यासका लागि खर्च गरिने क्लबकाे याेजना छ । मुख्य पुरस्कारको रकम निश्चित भएपछि आयोजकलाई प्रतियोगिता आयोजना गर्न सहज भएको हाे ।

यसैगरी उत्कृष्ट खेलाडीलाई १ लाख ५० हजार, म्यान अफ दि म्याच ७० हजार, सर्वाधिक गोलकर्ता २० हजार, उत्कृष्ट प्रशिक्षक १५ हजार, उत्कृष्ट गोल रक्षक, उत्कृष्ट डिफेन्स, उत्कृष्ट मिड फिल्डर र उत्कृष्ट स्ट्राइकरलाई १५/१५ हजार रुपैंया नगद पुरस्कार प्रदान गरिने भनिएकाे छ ।

गोर्खा ब्रुअरीको प्रमुख प्रायोजनमा हुने प्रतियोगिताकाे अनुमानित बजेटमा ६६ लाख रुपैंया अनुमान गरिएको छ । खर्च ५१ लाख ३२ हजार रुपैंया हुने अनुमान छ । ‘यो प्रारम्भिक अनुमान हो, नाफा नै हुन्छ भनेर भन्न सकिन्न ।’ अध्यक्ष राईले भने ।

कोरोना महामारीका कारण स्थानीय साधन श्रोत जुट्न कठिन रहेकाे, गोल्डकपको २२ औं संस्करणमा प्रदेश १ सरकारले विनियोजन गरिसकेको रकम नदिएको र राष्ट्रिय खेलकुद परिषदले अहिलेसम्म रकम भुक्तान नगर्दा क्लबलाई संकट परेकाे बताइएकाे छ । त्यसाे त, धरान फुटवल क्लबलाई आर्थिक पारदर्शिता नराखेकाे आराेप विगत वर्षहरूदेखि नै लाग्दै आएकाे छ ।