पर्सा । देशभर नेकपा एमालेमा प्रवेश गर्नेहरुको लहर चलेसँगै प्रदेश २ को विरगञ्जमा पनि त्यसको रौनक चलेको छ । विरगञ्ज महानगरपालिकाका मेयर विजय कुमार सरावगी नै नेकपा एमालेमा समाहित भएपछि पर्सामा कांग्रेस, माओवादी, समाजवादी लगायत पार्टी परित्याग गर्नेहरु बढेका छन् ।

नेकपा एमालेले पनि आउँदो स्थानीय निर्वाचनमा ऐतिहासिक जित हासिल गर्ने गरी संगठन निर्माण, सुदृढिकरणका अभियानहरु चलाउँदै आएको छ । एमाले नेता बसरुद्धिन अन्सारी, जिल्ला इन्चार्ज प्रभु हजरालगायत जिल्लाका नेताहरु संगठित रुपमै गाउँगाउँ गएपछि विरगञ्जसँगै पर्सा जिल्ला नै एमाले भएको छ ।

अहिले विरगञ्जका हरेक वडाहरुमा पार्टीको कार्यालय स्थापना गर्ने, युवा संगठन गठन गर्ने, जनताका गुनासा, समस्याहरु सुन्दै स्थानीय तहमै समाधान गर्न सक्ने भए त्यसलाई हल गर्ने काम भइरहेको बसरुद्धिन अन्सारीले बताए ।

यसैक्रममा आज विरगञ्ज वडा नं. २ मा एमालेको पार्टी कार्यालय सञ्चालनमा ल्याइएको छ । उक्त पार्टी कार्यालयको जिल्ला इन्चार्ज प्रभु हजरा, एमाले नेता बसरुद्धिन अन्सारीले उद्घाटन गरेका छन् । अन्सारी केही समय यता विरगञ्जमै रहेर पार्टीको राजनीतिमा सक्रिय छन् । मुलुक र जनताका लागि सोच्ने एक मात्र राजनेता केपी शर्मा ओलीमात्र आफुले देखेको बताउँदै अन्सारीले अन्य दलका नेताहरु व्यक्तिगत स्वार्थ केन्द्रीत राजनीतिमा लागेको बताए ।

विरगञ्ज महानगरपालिकाको निर्वाचनमा ऐतिहासिक जित हासिल गर्ने रणनीतिका साथ केही समय अगाडी पार्टी अध्यक्ष केपी शर्मा ओली नै विरगञ्ज गएर विरगञ्जमा मेयर सरावगी सहित सयौंलाई पार्टीमा प्रवेश गराएका थिए ।

नेकपा एमालेले मधेशको वास्तविक समस्या पहिचान गरी समाधान गर्ने, संविधानमा भएका मधेशका असहमतिलाई सर्वसम्मत रुपमा संसोधन गर्ने, मधेशको आर्थिक, सामाजिक, राजनीतिक अधिकार संस्थागत गर्ने लगायतका रणनीतिहरु बनाइरहेको र अबको निर्वाचनमा स्पष्ट बहुमत ल्याएर कार्यान्वयन गर्ने अभियान चलाइरहेको छ ।