काठमाडौं । वरिष्ठता र प्रक्रिया मिचेर प्रधानमन्त्री शेरबहादुर देउवाको दवावमा मन्त्रिपरिषद्ले तेश्रो नम्बरमा रहेका धिरजप्रताप सिंहलाई प्रहरी महानिरीक्षक (आइजीपी) नियुक्त गरेकोमा कांग्रेस नेता डा. शेखर कोइरालाले कडा आपत्ति जनाएका छन् ।

आज दिउसो बसेको मन्त्रिपरिषद् बैठकले गृह मन्त्रालयको सिफारिसमा समेत तेश्रो नम्बरमा परेका अतिरिक्त प्रहरी महानिरीक्षक सिंहलाई प्रहरी महानिरीक्षकमा नियुक्त गरेको थियो ।

बरिष्ठताका आधारमा विश्वराज पोखरेललाई आइजीपी नियुक्त गर्नुपर्नेमा देउवाले गृह मन्त्रालयको सिफारिसमा तेश्रो नम्बरमा परेका सिंहलाई बनाएपछि सर्वत्र विरोध भएको छ । डा. शेखरले ‘सरकारले वरिष्ठता र प्रक्रिया मिचेर बिधिको शासनको खिल्ली उठाएको बताएका छन् । ‘बरिष्ठता र प्रक्रिया मिचेर नेपाल प्रहरीको आइजीपी नियुक्त गर्ने सरकारको निर्णयले बिधिको शासनको खिल्ली उडाउने काम गरेको छ ।’ डा. शेखरले सामाजिक सञ्जालमा लेख्दै भनेका छन्–‘सरकारको यो निर्णयले सिंगो प्रहरी संगठनलाई फेरी एकपटक विवादमा ल्याएको छ ।’

सिंहसँगै विश्वराज पोखरेल, सहकुलबहादुर थापा र रवीन्द्रबहादुर धानुक पनि प्रहरी महानिरीक्षक बन्ने कसरतमा भएपनि सरकारले तेस्रो वरियतामा रहेका सिंहलाई आईजीपी नियुक्त गरेको हो ।

प्रहरी नियमावली–२०७१ को नियम ४१ मा एआईजीमध्येबाट ‘सरकारले उपयुक्त ठानेका उम्मेवारलाई प्रहरी महानिरीक्षकमा बढुवा गर्न सक्ने भनिएको छ ।

तर जेष्ठता, कार्यकुशलता, कार्यक्षमता, नेतृत्व प्रदान गर्न सक्ने कुशलता तथा आफूभन्दा मुनिको प्रहरीलाई प्रोत्साहन र परिचालन गर्न सक्ने सामर्थ्य लगायतलाई आधार बनाएर निर्णय लिने भनिएको छ । यस हिसाबले पोखरेल सिफारिसमा पहिलो नम्बरमा परेका थिए ।

मन्त्रिपरिषद्को निर्णय विरुद्ध सिंहभन्दा सिनियर पोखरेल र थापा अदालत जाने तयारीमा रहेका छन् । श्रोतका अनुसार उनीहरु अहिले कानुन व्यवसायीसँग छलफलमा रहेका छन् ।