बैशाख ३० गते हुन गइरहेकाे स्थानीय तहकाे निर्वाचनका लागि आज बेलुकीसम्म सबै जिल्लाहरूमा मतपत्र पुग्ने निर्वाचन आयोगले जनाएकाे छ । मधेस प्रदेशका ८ जिल्ला बाहेक अरु जिल्लामा यसअघि नै मतपत्र ढुवानी भइसकेको छ ।

आयोगका प्रवक्ता शालिग्राम शर्मा पौडेलले आज बेलुकासम्ममा सबै जिल्लामा मतपत्र ढुवानी भइसक्ने जानकारी दिए । आयोगले हिजो पालिका चुनावका लागि आवश्यक मतपत्र छपाइको काम सकिएको जनाएको थियो ।

यसपालि दुई करोड सात लाख चार हजार मतपत्र छापिएको छ । ४३ पालिकामा पुनः मतपत्र छाप्नु परेकाले यसअघिको लक्ष्यभन्दा धेरै छपाइ भएको आयोगका प्रवक्ता पौडेलले बताए ।

पुनः १३ लाख चार हजार मतपत्र छापिएको हो । आयोगले ६ महानगर र भक्तपुरका लागि आवश्यक मतपत्र उम्मेदवारको अन्तिम नामावली प्रकाशन भएपछि छपाइ थालेको थियो । पालिका चुनावका लागि कुल मतदाता एक करोड ७७ लाख ३३ हजार ७ सय २३ जना रहेका छन् ।