सुनसरी । धरानको खानेपानी समस्या समाधानकै लागि आफु मेयर बनेको बताउँदै आएका धरान उपमहानगरपालिकाका नवनिर्वाचित मेयर हर्कराज साम्पाङ आफ्नो प्रमुख उद्देश्य प्राप्त गर्न फिल्डमा उत्रिएका छन् । जीतको खुसीयाली समेत राम्ररी साट्न नपाउँदै धरानका मेयर साम्पाङ खानेपानी समस्या हल गर्न फिल्डमा उत्रिएका हुन् ।

आज धरानको खानेपानी मुहानको स्थलगत निरीक्षण गर्दै मुहानमा रहेका संरचनाहरुको कमजोरी सच्याउन साम्पाङले निर्देशन दिए । ‘खानेपानीको मूहान अवलोकन गरी कम्जोरी सच्याउने र फोहोर गर्न नदिने निर्देशन दिइयो ! जय धरान !’ सामाजिक सञ्जालमा मेयर साम्पाङले लेखेका छन् ।

स्थानीय तहको निर्वाचनमा अत्याधिक मतका साथ निर्वाचित भएसँगै विजय र्यालीमा लगाएको अबिरको रंगपनि सुक्न नपाउँदै खानेपानी समस्या समाधनार्थ फिल्डमा उत्रिएकोमा साम्पाङको प्रशंसा भइरहेको छ ।

स्वतन्त्र उम्मेदवार बनेर नगर प्रमुखको जिम्मेवारी पाएका साम्पाङलाई दलीय राजनीतिक दाउपेचले काम गर्न सहज छैन । नगरप्रमुखको पदवहाली हुँदै गर्दा साम्पाङले सबै राजनीतिक दलहरुको साथ र सहयोग लिएर अगाडी बढ्ने बताएता पनि राजनीतिक दलबाट निर्वाचित भएर आएका वडाध्यक्ष र उपप्रमुखले सकाररात्मक सहयोग गर्लान् भन्नेमा शंका छ ।

यद्यपि, मेयर साम्पाङले धरानका राजनीतिक दल, नागरिक समाज तथा सरोकारवालाहरुसँग सहकार्य गरेर अगाडी बढ्ने प्रतिबद्धता जनाएका छन् ।

मेयर साम्पाङले आफ्नो ५ वर्षे कार्यकालमा धरानबासीलाई सहजरुपमा खानेपानी खुवाएरै छाड्ने नसके धरान नै छाड्ने घोषणा गरेका छन् ।