काठमाडौं, १३ असोज । सिनामंगलस्थित काठमाडौं मेडिकल कलेजले ललितपुरको जाउलाखेलमा निःशुल्क स्वास्थ्य शिविर आयोजना गरेको छ । आज ललितपुर उपमहानगरपालिका वडा नं. ३ स्थित लाइफ लाइन हेल्थ होम प्रा.लि.सँगको सहकार्यमा गरिएको निःशुल्क स्वास्थ्य शिविरमा ६४६ जना बिरामीको स्वास्थ्य परीक्षण गरिएको छ ।

उक्त शिविरमा १२३ जनाको इसिजी गरिएको, २२१ जनाको ल्याव परीक्षण गरिएको, १५३ जनाको युएसजी गरिएको कलेजका जनरल मेनेजर नारायण दाहालले जानकारी दिए । उनका अनुसार शिविरमा स्वास्थ्य परीक्षणका लागि आएका २३ जनाको दाँत खोलिएको तथा २२ जनालाई थप उपचारका लागि ओ.टी. रेफर गरिएको छ ।

केएमसीले सञ्चालन गर्दै आइरहेको निःशुल्क स्वास्थ्य शिविरबाट आम सर्वसाधारण लाभान्वित भइरहेका छन् । स्वास्थ्य शिविरमा नाक कान घाँटी, आँखा रोग, दन्त रोग, स्त्री रोग, बालबालिका तथा जनरल मेडिसिन लगाएत विषयमा दक्ष स्वास्थ्यकर्मीहरुले सेवा दिने केएमसीका कार्यकारी अध्यक्ष डा. सुनिल शर्माले बताए ।