काठमाडौं, ९ माघ । अख्तियार दुरुपयोग अनुसन्धान आयोगले धरानस्थित वीपी कोइराला स्वास्थ्य विज्ञान प्रतिष्ठानका उपकुलपति डा. ज्ञानेन्द्र गिरीविरुद्ध भ्रष्टाचार मुद्दा दायर गरेकाे छ । आयोगले नपाएको ओहोदा पाएँ भनी पदीय मर्यादा विपरीत काम गरेको भन्दै डा. गिरीविरुद्ध विशेष अदालतमा मुद्दा दायर गरेको हो ।

अख्तियारका प्रवक्ता श्यामप्रसाद भण्डारीले डा. गिरीले गरेको काम भ्रष्टाचार निवारण ऐन, २०५९ को दफा १५ बमोजिमको कसुर भएको भन्दै अख्तियारले उनलाई सोही दफा अनुसार एक वर्षदेखि २ वर्षसम्म कैद र ५० हजार देखि १ लाख रुपैयाँ जरिवाना माग गरिएको बताए ।

उपकुलपति पदमा नियुक्ति भइसकेपछि नियमित काम गर्ने क्रममा अरुले विश्वास गरोस् भनी बदनियत साथ आधिकारीक निकायबाट प्राप्त नपाएको ओहदा पाएँ भनी दुरुपयोग गरेको देखिएको छ ।’ भण्डारीले भने ।

प्रतिष्ठानको उपकुलपति नियुक्त डा. गिरीले आफ्नो नामको अगाडि प्राध्यापक लेख्दै आएका थिए । उनको प्राध्यापक पद नक्कली भएको भन्दै लामो समय प्रतिष्ठानमा आन्दोलन भएको थियो । साथै उक्त कार्यमा ज्ञानेन्द्रमान सिंह कार्कीको मतियारको भूमिका देखिएको भन्दै अख्तियारले भ्रष्टाचार निवारण ऐन, २०५९ को दफा २२ बमोजिम कसुरमा कार्कीविरुद्ध पनि मुद्दा दायर गरेको छ ।

आयोग र नेपाल मेडिकल काउन्सिलले प्रतिष्ठानका 'फ्याकल्टी'बारे अध्ययन गर्न टोली बनाएकोमा डा. गिरीले 'प्राध्यापक' लेख्न पाउने कानुनी आधार नभएको बताएकाे थियाे ।