काठमाडौं, २५ माघ । काठमाडौं मेडिकल कलेजले बौद्धमा निःशुल्क स्वास्थ्य शिविर आयोजना गरेको छ । केएमसीले आज अरुणिमा स्कुलसँगको सहकार्यमा निःशुल्क स्वास्थ्य शिविर सञ्चालन गरेको हो ।

उक्त स्वास्थ्य शिविरमा ५९३ जना बिरामीको स्वास्थ्य परीक्षण गर्दा ८९ जनाको इसिजी, ७५ जनाको ल्याब परीक्षण र ९० जनाको भिडियो एक्सरे गरिएको केएमसीका जनरल मेनेजर नारायण दाहालले जानकारी दिए । स्वास्थ्य शिविरमा आएका मध्ये ७ जनाको दाँत खोलिएको थियो भने, २२ जनालाई थप उपचारका लागि ओ.टी. रेफर गरिएको छ ।

सामाजिक उत्तरदायित्व अन्तरगत केएमसीले २ वर्षयता लगातार गरेको निःशुल्क स्वास्थ्य परीक्षणबाट हज्जारौं सर्वसाधारण लाभान्वित भइसकेका छन् । निःशुल्क स्वास्थ्य शिविरमा केएमसीका विशेषज्ञ चिकित्सकहरुले नाक कान घाँटी, आँखा रोग, दन्त रोग, जनरल मेडिसिन, स्त्री रोग लगायतको स्वास्थ्य परीक्षण गर्ने गरेको प्रिन्सिपल प्रा.डा. रतिन्द्रनाथ श्रेष्ठले जानकारी दिए । केएमसीमा तत्कालिन कार्यकारी अध्यक्ष डा. सुनिल शर्मा (हाल प्रतिनिधि सभा सांसद) ले निःशुल्क स्वास्थ्य शिविरको अभियान थालनी गरेका हुन् ।