मोरङ, २७ माघ । प्रतिनिधि सभा सदस्य डा. सुनिल शर्माले आफ्नो क्षेत्रका जनताको लागि सञ्चालन गरेको निःशुल्क एम्बुलेन्स क्याम्पबाट १७० जना बिरामी लाभान्वित भएका छन् । मोरङ क्षेत्र नं. ३ का संघीय सांसद डा. शर्माले सञ्चालन गरेको एम्बुलेन्सको पछिल्लो श्रृंखला बयरबन गाउँपालिका ६, रमाइलोमा भएको छ ।

उक्त स्वास्थ्य शिविरमा ३५ जनाको इसिजी, ४२ जनाको ल्याब परीक्षण, ३९ जनाको भिडियो एक्सरे गरिनुका साथै ३ जनाको दाँत खोलिएको नोबेल शिक्षण अस्पतालका अस्पताल प्रबन्धक नारायण दाहालले जानकारी दिए । स्वास्थ्य शिविरमा नाक कान घाँटी, आँखा रोग, दन्त रोग, जनरल मेडिसिन, नसा तथा हाडजोर्नी लगायतको स्वास्थ्य परीक्षणहरु भएको छ ।

शिविरमा आएकाहरु थप उपचारका लागि नोबेल शिक्षण अस्पताल आए विभिन्न छुटहरु समेत दिइने गरिएको छ । नोबलकी प्रबन्ध निर्देशक इन्दीरा शर्माले सामाजिक उत्तरदायित्व अन्तरगत सांसद डा. शर्माको अभियानलाई सफल बनाउन निःशुल्क एम्बुलेन्स क्याम्प चलाइएको बताइन् । नोबेलमा सांसद डा. शर्माले आफ्नो क्षेत्रका जनतालाई सर्वसुलभ स्वास्थ्य उपचार सेवा दिने अभिप्रायले ५० वेडको निःशुल्क क्याविनको समेत स्थापना गरेका छन् ।