विरगञ्ज, २९ माघ । नेशनल मेडिकल कलेज शिक्षण अस्पताल विरगञ्जले निःशुल्क आँखा शिविर सञ्चालन गरेको छ । शनिबार पोखरिया नगरपालिका वडा नं. ४ स्थित श्री जिल्ला उच्चाङ्गलरामदेव कलवार माध्यामिक विद्यालयको प्राङ्गणमा आयोजित निःशुल्क आँखा शिविरमा सयौं सर्वसाधारणको आँखा जाँच गरिएको छ ।

नेशनल मेडिकल कलेजका दक्ष चिकित्सकहरुद्वारा गरिएको निःशुल्क आँखा शिविरमा महिला, ज्येष्ठ नागरिक तथा सर्वसाधारणले आँखा जाँच गराएको कलेजले जनाएको छ । शिविरमा छनौट भएका मोतियाविन्दुका बिरामीहरुको कलेजले विशेष सहुलियतमा शल्यक्रिया गरिने भनिएको छ ।

सामाजिक उत्तरदायित्व अन्तरगत स्थानीय तहमै गएर निःशुल्क आँखा शिविर सञ्चालन गरिएको कलेजका म्यानेजिङ डाइरेक्टर बसरुद्धिन अन्सारीले बताए । ‘यो क्षेत्रमा आँखाका रोगीहरु बढी भएको जानकारीमा थियो । अस्पताल सम्म आउन नसकेकाहरुलाई निःशुल्क सेवा दिन शिविर गरिएको हो ।’ म्यानेजिङ डाइरेक्टर अन्सारीले भने ।

बारा, पर्सा लगायत मधेस प्रदेशको स्वास्थ्य सेवामा नेशनल मेडिकल कलेजले महत्वपूर्ण योगदान दिइरहेको छ । पर्सा विरगञ्जमा रहेको कलेजले पछिल्लो समय स्वास्थ्य उपचारमा दक्ष जनशक्तिसँगै अत्याधुनिक स्वास्थ्य उपकरणहरु समेत सञ्चालनमा ल्याएकाले जटिल प्रकारका बिरामीहरु उपचारका लागि राजधानी र भारतीय सहरमा जानुपर्ने बाध्यता कम हुँदै गइरहेको छ ।