काठमाडौं, १२ फागुन । प्रतिनिधि सभाको आज शुक्रबार बसेको बैठकमा मोरङ क्षेत्र नं. ३ का सांसद डा. सुनिल कुमार शर्मा बजनदार सुनिए । पूर्वाञ्चल विश्वविद्यालयमा मेडिकल कलेज सञ्चालनमा देखिएको अवरोध, सुकुम्बासी समस्या र पछिल्लो समय आर्थिक क्षेत्रमा देखिएका समस्याका सन्दर्भमा पहिलो पटक संसदमा बोल्दा डा. शर्माको प्रस्तुति सशक्त देखियो ।

४ मिनेटको समय पाएका डा. शर्माले सुरुमै पूर्वाञ्चल विश्वविद्यालयमा मेडिकल कलेज सञ्चालन गर्नका लागि कर्मचारी तन्त्रबाटै असहयोग भएको भन्दै सभामुखलाई ध्यानाकर्षण गराए । विश्वविद्यालय स्थापना भएको २८ वर्ष भइसक्दा पनि मेडिकल कलेज सञ्चालन हुन नसकेको जनाउँदै पछिल्लो समय आफुले मेडिकल कलेज सञ्चालन गर्न प्रयास गर्दा कर्मचारी तन्त्रबाटै सहयोग नपाएको बताए । मोरङबासी सहित प्रतिनिधि सभा र राष्ट्रिय सभाका सदस्यहरुको पहलमा पछिल्लो समय मेडिकल कलेज सञ्चालन गर्न कोशिष गरिरहँदा पनि सफल हुन नसक्नुमा कर्मचारी बाधक बनेको डा. शर्माको दावी छ ।

‘मोरङबासीहरु, प्रतिनिधि सभा, राष्ट्रिय सभाका सदस्यहरुको पहलमा प्रधानमन्त्री ज्यूलाई आग्रह गर्यौं, मैले व्यक्तिगत रुपमा २ पटक उहाँलाई भेटे, उहाँले जिम्मेवारीपूर्वक तुरुन्तै मुख्यसचिबलाई भनिदिनुभयो । त्यसपश्चात स्वास्थ्यमन्त्रीलाई पनि कुरा गर्नुभयो र त्यो क्याविनेटमा गयो र त्यहाँबाट पनि तुरुन्त पास भयो । एजेण्डा त पास भयो तर, मुलुकको विडम्बना कस्तो रहेछ भने सभामुख महोदय, यहाँ चाहे सांसद होस् या सरकारमा बस्ने मन्त्रीहरु नै किन नहुन् व्यूरोक्र्याटस र कर्मचारीहरुका अगाडी निरिह भएको महशुष गरे ।’ डा. शर्माले स्वास्थ्य मन्त्रालयमा कर्मचारीहरुले विश्वविद्यालयको फायल गायब गरेर दुखः दिएको पनि बताए । ‘हामी मन्त्रालय धाएको धाई छौं काम हुँदैन ।’ चिकित्सा शिक्षा आयोगबाट तत्काल इन्सेप्सन गराएर एक हप्तादेखि १५ दिनभित्र यसैपालीदेखि मेडिकल कलेज सञ्चालनको वातावरण बनाईदिन अनुरोध गर्दछु ।’ डा. शर्माले भने ।

यस्तै डा. शर्माले आजकै संसदमा सुकुम्बासी समस्याका विषयमा बोल्दै प्रजातन्त्र आएदेखि २, ३ प्रतिशत बढी सुकुम्बासीहरु वाहेकले धनीपुर्जा नपाएको जिकीर गर्दै सुकुम्बासी आयोगका नाममा पदाधिकारी, कर्मचारी नियुक्त हुनु वाहेक केही नपाएको बताए । ‘गाउँमा विजोक छ जनताको, द्वैध स्वामित्वका नाममा जनता ४०, ५० वर्षदेखि जोतभोग गरेर बसिरहेका छन्, एउटा सामन्तले कहाँ बसेर कुन सेटिङमा कसलाई पैसा खुवाएर धनीपुर्जा बोकेर काठमाडौं बसेको छ कि अमेरिकामा बसेको छ, विचरा जनता चैं द्वैधस्वामित्वको नाममा अर्काको जमिनमा बसिरहनु परेको छ ।’ सुकुम्बासी समस्या समाधान गर्ने होभने टाइम फ्रेम निर्धारण गरेर जानुपर्ने बताए । ‘यो ३० वर्षसम्म गीत गाएर राज्यको पैसा खर्च गरेर धनीपुर्जा नदिइकन जनतालाई जस्ताको तस्तै राखेर भोट बैंकको रुपमा प्रयोग गर्न बन्द गरियोस् ।’ डा. शर्माले भने ।

उनले कर्णाली प्रदेशका अस्पतालहरुमा सामान्य स्वास्थ्य सुविधाहरु समेत नभएको जनाउँदै तत्काल स्वास्थ्य उपकरण र औषधीहरु व्यवस्था गर्न माग गरे । डा. शर्माले संसद भवन अगाडी आत्मदाह गर्ने प्रेमप्रसाद आचार्य र मेडिकल व्यवसायी दुर्गा प्रसाईंहरु समाजका दुई पात्रले उठाएका विषयहरु फरकफरक भएपनि मुद्दा एउटै भएको उल्लेख गर्दै लघुवित्त र बैंकको व्याजदरको विषयमा संसद भवन अगाडी आत्मदाह गर्दासमेत सदन मृतः जस्तै बस्दा भावी सन्ततीले भविष्यमा धिक्कार्ने जिकीर गरे ।

डा. शर्माले सदनमा पहिलोपटक संवोधन गरेपनि उनको संवोधन र विषयहरु समय सापेक्ष र गम्भिर थियो । ४ मिनेटको समयमा उनले आफ्नो क्षेत्रको समस्याका विषयमा मात्र नभएर सुकुम्बासी समस्या, कर्णालीका समस्या र पछिल्लो समय खस्कँदो बैंक तथा वित्तीय संस्थाको ब्याजदरका कारण उद्योगी व्यवसायीले भोग्नु परेको विषयहरुलाई संवोधन गर्न भ्याए ।