सुनसरी, १६ फागुन । नेकपा एमाले दुहवी नगर कमिटीले एक जना जुझारु इमान्दार कार्यकर्ता तथा युवा व्यवसायी गुमाएको छ । एमाले दुहवी ५ सदस्य समेत रहेका दुहवी बजारमा हरेराम होटलका सञ्चालक हरेराम साहलाई सवारी दुर्घटनामा गुमाएको हो ।

उनीसँगै दुहवी नगरपालिकाकी स्वास्थ्य स्वयं सेविका राजकुमारी चौधरीको पनि दुर्घटनामा परी मृत्यु भएको छ ।

मंगलबार सप्तरी, कञ्चनरुप नगरपालिका ९ स्थित पूर्वपश्चिम सडक खण्डमा विहान २ः४० बजे कार र पिकअप एकापसमा ठोक्किँदा उनीहरुको निधन भएको हो । सडक दुर्घटनामा अन्य १२ जना घाइते भएको जिल्ला प्रहरी कार्यालय सप्तरीका एसपी नरेन्द्रकुमार कार्कीले जानकारी दिए ।

पश्चिमबाट पुर्वतर्फ जाँदै गरेको बा १८ च ६६ १७ नम्बरको कार विपरित दिशाबाट आउँदै गरेको २–०२–००१ च ०७४६ नम्बरको पिकअपसँग ठोक्किएको थियो । दुर्घटनामा पिक अपमा रहेका २ वटा घोडाको समेत मृत्यु भएको छ ।