विरगञ्ज, १७ फागुन । मधेश प्रदेशकै स्वास्थ्य क्षेत्रमा योगदान पुर्याउँदै आएको नेशनल मेडिकल कलेज विरगञ्जले भर्खरै जन्मिएका शिशुहरुको केयरको लागि नवजात केयर ओपिडी सञ्चालनमा ल्याएको छ । आज कलेजका म्यानेजिङ डाइरेक्टर बसरुद्धिन अन्सारीले बाराका सांसद अच्युतप्रसाद मैनालीको उपस्थितिमा नवजात केयर ओपिडी उद्घाटन गरे ।

सो अवसरमा बोल्दै म्यानेजिङ डाइरेक्टर अन्सारीले भर्खरै जन्मिएका शिशुहरुको उपचार र स्याहारमा नवजात केयर ओपिडीले योगदान गर्ने बताए । भर्खरै जन्मिएका शिशुहरुलाई उचित स्याहार र उपचार नहुँदा ठूलो स्वास्थ्य समस्याहरु आउने पनि बताए । उक्त ओपिडीमा कलेजले विशिष्टीकृत सेवा प्रदान गर्ने उद्देश्यले अनुभवी तथा विशेषज्ञ बालरोग चिकित्सकको व्यवस्था गरेको अन्सारीको भनाई छ ।
१५ वेडको ओपिडी सेवाबाट बारा, पर्सा, रौतहट लगायत मधेश प्रदेश र सिमावर्ती भारतबाट समेत उपचारका लागि बिरामीहरु लाभान्वित हुनेछन् ।

विरगञ्जकै सुविधासम्पन्न मेडिकल कलेजका रुपमा सञ्चालित नेशनल मेडिकल कलेजले आफ्नो स्वास्थ्य सेवाहरुलाई विशिष्टीकृत गर्दै लगेकोमा प्रतिनिधि सभा सांसद अच्युत प्रसाद मैनालीले खुसी व्यक्त गरे । स्वास्थ्य क्षेत्रको विकास र जनतालाई राज्यले सर्वसुलभ सेवा दिन नसकिरहेकोमा नीजि क्षेत्रबाट भएको प्रयासलाई सरहाना गरे ।

कार्यक्रममा कलेजका प्रिन्सिपल प्रा.डा. केएन सिंह, हस्पिटल डाइरेक्टर इजरत जहान, नवजात रोग विशेषज्ञ डा. धिरेन्द्र लगायत नर्स र स्टाफहरुको सहभागीता रहेको थियो ।