काठमाडौं, १९ फागुन । बैंक तथा वित्तीय संस्थाबाट ऋण लिएपछि तिर्न नपर्ने भनाइहरू गलत भएकाे बैंक तथा वित्तीय संस्थासम्बद्ध संघसंगठनले बताएका छन् । पछिल्लाे समय लगातार बैंक तथा वित्तीय संस्थाहरू विरूद्ध संगठित रूपमै आन्दाेलनहरू हुन थालेपछि संघ संगठनहरूले ध्यानाकर्षण गराएका हुन् ।

केही व्यवसायीहरूले बैंक तथा वित्तीय संस्थाविरुद्ध नकारात्मक टिप्पणी तथा आन्दोलन गरेको भन्दै बैंक तथा वित्तीय संस्थासम्बद्ध संघसंगठनले ध्यानाकर्षण भएको भन्दै धम्कीपूर्ण अभिव्यक्तिहरू र अराजक व्यवहार भनेका छन् । त्यस्ता क्रियाकलापबाट कर्मचारीहरू हतोत्साही हुने, बैंक तथा वित्तीय संस्था डुवाउने खेल भइरहेकाे उनीहरूकाे धारणा छ ।

बैंक तथा वित्तीय संस्थाहरूले ४ करोड ८३ लाखभन्दा धेरै निक्षेप खाता मार्फत झण्डै ५ हजार ४०० अर्ब निक्षेप संकलन र १८ लाखभन्दा धेरै ऋणीहरु मार्फत् ४ हजार ८०० अर्बभन्दा धेरै कर्जा परिचालन गर्दै आइरहेकाे जनाउँदै देशको दूरदराजमा लघुवित्त संस्थाहरूले झण्डै ६० लाख निक्षेप खाता तथा ३२ लाख भन्दा धेरै ऋणीहरूलाई सेवा प्रदान गरिरहेको संयुक्त विज्ञप्तिमा जनाइएकाे छ ।

नेपाल बैंकर्स संघ, नेपाल वित्तीय संस्था संघ, डेभलपमेण्ट बैंकर्स एशोसिएसन नेपाल, नेपाल वित्तीय संस्था संघ र नेपाल लघुवित्त बैंकर्स संघले जारी गरेकाे संयुक्त विज्ञप्तिमा भनिएकाे छ । ‘कुनै पनि बैंक वित्तीय तथा लघुवित्त संस्थाबाट ऋण लिएपछि नियमित रूपमा कर्जाको साँवा किस्ता तिर्नु ऋणीको पहिलो दायित्व हुनेमा दुई मत छैन । विभिन्न शर्तहरूको अधिनमा रही बैंक तथा वित्तीय संस्थाबाट कर्जा लिएपछि नतिर्ने भन्नु अराजकता हुनुका साथै यस प्रकारका कियाकलापहरू कसैको हितमा नहुने, यसले असहज वातावरण सृजना गर्ने र आर्थिक गतिविधिमा समेत नकरात्मक असर पार्न सक्ने हुनाले यस प्रति सजग रहन हामी सबैमा आग्रह गर्दछौं ।’

बैंक/ वित्तीय संस्था र लघुवित्तहरू नियामक निकायद्वारा जारी गरिएकाे नीति/निर्देशन तथा विभिन्न कानुन र ऐनमा रहेर बैकिङ सेवाहरू प्रदान गर्दै रहेकाे बताइएकाे छ ।