काठमाडाैं, २२ फागुन । युएईलाइ उसकै घरेलु मैदानमा पराजित गर्दै आइसिसी विश्वकप लिग-२ अन्तर्गत नेपालले महत्वपूर्ण जीत निकालेकाे छ । युएई र पपुवा न्युगिनी (पिएनजी) बीचको त्रिकोणात्मक एकदिवसीय सिरिजको अन्तिम खेलमा नेपालले युएईलाई ४२ रनले पराजित गरेकाे हाे ।

नेपालले दिएको २३० रनको लक्ष्य पछ्याएको युएई ४५ ओभरमा १८७ रनमा अलआउट हुँदा युएईका लागि ओपनिङ ब्याट्सम्यान आसिफ खानले ८२ रन जोडे । ४२ ओभरमा सातौं विकेटको रुपमा दिपेन्द्रसिंह ऐरीले खानलाइ आउट गरे । युएइका लागि आर्यन लक्राले ५० र वृत्य अरविन्दले १३ रन बनाए । युएईका अन्य ब्याट्सम्यान दोहोरो अंकमा रन जाेड्न सकेनन् ।

बलिङमा नेपालका सोमपाल कामी र दिपेन्द्रसिंह ऐरीले ३-३ विकेट लिएर उत्कृष्ट प्रदर्शन गरे । टस जितेर पहिले ब्याटिङ राेजेकाे नेपालकाे सुरूवाती प्रदर्शन खराब रह्याे । तथापि, नेपालका लागि भीम सार्कीले उत्कृष्ट प्रदर्शन गर्दै ७० रन बनाए ।

पाँचौं नम्बरमा ब्याटिङका लागि आएका सार्कीले ९९ बल खेल्दै ७ चौकासहित ७० रन बनाए । उनी ४३ औं ओभरको तेस्रो बलमा रोहन मुस्ताफाको बलमा बोल्ड  भए । त्यस अगाडि सन्दीप लामिछानेसँग ५६ रन र आरिफ शेखसँग ५६ रनको साझेदारी गरे ।

खेलमा कुशल मल्लले ३२, सन्दीप लामिछानेले २७ रन बनाउँदा करण केसीले ११ बलमा १७ रन बनाए । ज्ञानेन्द्र मल्ल ११, आरिफ शेख ६, रोहित पौडेल १ र दीपेन्द्र सिंह ऐरीले ४ रन बनाउँदा निर्धारित ५० ओभरमा ८ विकेट गुमाउँदै नेपालले २२९ रन बनाउन सफल भयाे । आरिफ शेखले नटआउट ४३ रन बनाउँदा प्रतिश जिसीले नटआउट ११ रन बनाए ।

बलिङमा युएईका जुनइद सिद्धिकीले ३ विकेट लिँदा रोहान मुस्ताफा र आर्यान लक्राले २-२ विकेट लिए ।

नेपाल, युएई र पपुवा न्युगिनीबीच अब नेपालमा फागुन २५ देखि लिग-२ को अन्तिम सिरिज हुँदैछ । लिग-२ को शीर्ष तीन टिम विश्वकप छनोटमा पुग्नेछन्। पुछारका चार टिमले क्वालिफायर प्लेअफ खेल्नु पर्नेछ । यस्तै शीर्ष पाँच टिमको एकदिवसीय मान्यता जोगिनेछ ।

लिगमा पाँचौ स्थानको उक्लिएको नेपालले ३२ खेलबाट ३२ अंक जोडेको छ। युएई ३२ खेलबाट ३१ अंक जोड्दै छैटौं स्थानमा झरेको छ । पुछारको ‍पिएनजीको ३२ खेलबाट ९ अंक छ । लिग-२ मा च्याम्पियन बनेको स्कटल्यान्डले ३६ खेलबाट ५० अंक जोड्दा दोस्रो बनेको ओमानको ४४ अंक छ । स्कटल्यान्ड र ओमान विश्वकप छनोट पुगिसकेका छन् ।

तेस्रो स्थानको नामिबियाको ३६ खेलबाट ३९ अंक छ भने चौथो स्थानको अमेरिकाको समान खेलबाट ३५ अंक छ । अब नेपालले लिग-२ को शीर्ष तीन स्थानमा पुग्न बाँकी रहेका चार खेलबाट जित हासिल गर्दा एकदिवसीय मान्यता जोगाउन २ खेलमा जित निकाल्नु पर्छ ।

जीतसँगै नेपालले लिग-२ को अंक तालिकामा युएईलाई पछि पार्दा एकदिवसीय मान्यता लिग-२ बाटै जोगाउने र विश्वकप छनोटमा पुग्ने सम्भावना पनि कायम राखेको छ । अब नेपालले घरेलु मैदानमा हुने सिरिजका चार मध्ये दुई खेलमा जित हात पारे एकदिवसीय मान्यता जोगाउनेछ भने चारै खेल जिते विश्वकप छनोटमा पुग्नेछ ।