काठमाडौं, २७ फागुन । १० दलीय गठबन्धन महिला विरोधी भएको नेकपा एमाले अध्यक्ष केपी शर्मा ओलीले  जिकीर गरेका छन् । अखिल नेपाल महिला संघले शनिबार आयोजना गरेको कार्यक्रममा बाेल्दै पूर्वप्रधानमन्त्री ओलीले संविधानमै राष्ट्रपति र उपराष्ट्रपतिमध्ये एक महिला हुनुपर्ने व्यवस्था भएको भन्दै १० दलीय गठबन्धन महिला विरोधी रहेको जिकीर गरेका हुन् ।

१० दलीय गठबन्धन जालझेल गर्न खोजिरहेकाे बताउँदै उनले भने–‘१० दलीय गठबन्धन महिला विरोधी छ । गठबन्धनले कानुन छलेर साझा उम्मेदवार नमिलाईकन दिदैंछन् । मर्म अर्को समुदायसँग होइन। पुरुष हुन्छ भने महिला र महिला हुन्छ भने पुरुष हुन सक्नुपर्थ्यो, तर, संविधानमा स्पष्ट व्यवस्था भएन । राष्ट्रपति र उपराष्ट्रपतिमध्ये एक महिला हुनुपर्छ भन्ने संवैधानिक व्यवस्था देखिन्छ ।’

ओलीले अहिलेको संविधानमा ३३ प्रतिशत महिला र सबै पालिकामा प्रमुख र उपप्रमुखमध्ये एकमा महिला हुनुपर्ने प्रबन्ध गरेकाे र सभामुख, उपसभामुखमा अल्टरनेट हुनुपर्ने व्यवस्था रहेकाे स्मरण गराए ।