काठमाडौं, २९ फागुन । चैत्र ३ गते उपराष्ट्रपतिको निर्वाचन सम्पन्न भएसँगै नेपाली कांग्रेस सरकारमा जाने तयारीमा छन् । प्रधानमन्त्री पुष्पकमल दाहाल ‘प्रचण्ड’ले उपराष्ट्रपतिको निर्वाचन पछि संसदमा विस्वासको मत लिने र सरकार पुर्नगठन गर्ने रणनीति अपनाउँदा कांग्रेसबाट सरकारमा जानेहरुको चर्चा परिचर्चा पनि चलिरहेको छ ।

आज सोमबार नवनिर्वाचित राष्ट्रपति रामचन्द्र पौडेलको सपथ ग्रहण तथा निवर्तमान राष्ट्रपति विद्यादेवी भण्डारीको विदाई कार्यक्रममा सरकार गठनकै विषयमा चर्चा भए । सञ्चारकर्मीहरुले कांग्रेस सांसदहरुलाई कांग्रेस कसको नेतृत्वमा सरकारमा जान्छ ? को को मन्त्री बन्दैछन् ? भन्ने प्रश्न सोधेका थिए ।

सोही क्रममा मोरङ क्षेत्र नं.३ का सांसद डा. सुनिल शर्मालाई भने सञ्चारकर्मीहरुले तपाईं स्वास्थ्यमन्त्री बन्दै हुनुहुन्छ रे ? भन्दै प्रश्न गरे । लामो समयदेखि स्वास्थ्य शिक्षा र स्वास्थ्य सेवाका क्षेत्रमा सक्रिय सांसद डा. शर्माले भने आफु मन्त्री बन्दा स्वास्थ्य र शिक्षा मन्त्री भने नबन्ने बताए । आफु लामो समयदेखि राजनीतिमा सक्रिय रहेको जनाउँदै व्यवसाय र राजनीति फरक–फरक विषय रहेको बताउँदै आफ्नो व्यवसायमा जोडिएका मन्त्रालय नलिने बताए । ‘पार्टीले मन्त्री बनाउँदा पनि २ वटा मन्त्रालय जाँन्न भन्या छु, एउटा शिक्षा, एउटा स्वास्थ्य । व्यवसायसँग जोडिएका मन्त्रालय शिक्षा र स्वास्थ्य भएकाले ती मन्त्रालयमा जान्न ।’ डा. शर्माले भने ।

विवादित काममा हातै नहाल्ने बताउँदै डा. शर्माले विवाद नहुने मन्त्रालय पाए, पार्टीले सरकारमा पठाए काम गरेर देखाउने दावी गरे । पार्टीले जहाँ पठाएपनि राम्रो काम गरेर देखाउने डा. शर्माको भनाई छ । ‘मलाइ भ्रष्ट्राचार गर्नु छैन, पैसा कमाउनु छैन, पाइहाले अवसर भने अन्य मन्त्रालयहरूमा जान्छु, पार्टीले विस्वास गरेकाे खण्डमा पार्टीकाे इज्जत राख्ने गरी काम गर्छु ।’ डा. शर्माले भने ।

त्यस्तै सांसद डा. शर्माले राष्ट्रपतिले देशको संविधान, र कानुनको रक्षाका निम्ति काम गर्ने विस्वास लिएको बताउँदै उनले जनतालाई दुखः दिने काम बन्द गरिनुपर्ने पनि बताए । प्रधानमन्त्रीले गरेका गलत काम राष्ट्रपतिले रोक्न सक्नुपर्ने बताउँदै नवनिर्वाचित राष्ट्रपतिले निवर्तमान राष्ट्रपतिले जस्तो केपी शर्मा ओलीले पठाएका गलत निर्णयहरु हतारहतार स्वीकृत गरेजस्तो गर्न नहुने पनि बताए ।

योपटक कांग्रेसबाट उपसभापति पुर्णबहादुर खड्का र केन्द्रीय सदस्य प्रकाशमान सिंहको नेतृत्वमा सरकारमा जाने चर्चा चलिरहेको छ । साथै, डा. शेखर कोइरालाको नेतृत्वमा सरकारमा सहभागी हुनुपर्छ भन्ने मत पनि छ । तथापि, कांग्रेसमा देउवा र कोइराला दुवै पक्षले आधिकारिक रुपमा यसबारेमा मुख खोलेका छैनन् ।

उपराष्ट्रपतिको निर्वाचन पछि कांग्रेसले प्रधानमन्त्रीले विस्वासको मत लिएपछि मात्र सरकारमा जाने तयारी गरेको छ । प्रधानमन्त्री प्रचण्डले कांग्रेसलाई यसअघि नेकपा एमालेले लिएका ८ मन्त्रालय कांग्रेसलाई दिने र बाँकी मन्त्रालयहरु साना दललाई दिएर सरकार गठन गर्ने रणनीति बनाएको एक माओवादी केन्द्रका नेताले बताए ।