काठमाडौं, १३ चैत्र । ललितपुरको नः वहालमा काठमाडौं मेडिकल कलेजले निःशुल्क स्वास्थ्य शिविर आयोजना गरेको छ । आज ललितपुर महानगरपालिका वडा नं. १९ स्थित ज्वेल्स बचत तथा ऋण सहकारी संस्थाको कार्यालयमा आयोजित निःशुल्क स्वास्थ्य शिविरमा ६५१ जना बिरामीको स्वास्थ्य परीक्षण गरिएको छ ।

स्वास्थ्य शिविरमा ८७ जनाको इसिजी, १०५ जनाको ल्याब परीक्षण, ९७ जनाको भिडियो एक्सरे गरिएको केएमसीका जनरल मेनेजर नारायण दाहालले जानकारी दिए । स्वास्थ्य शिविरमा ७ जनाको दाँत खोलिएको तथा २२ जनालाई थप उपचारका लागि ओ.टी. रेफर गरिएको छ । शिविरमा महिला, बालबालिका, ज्येष्ठ नागरिक तथा विपन्न समुदायका नागरिकले स्वास्थ्य सेवा लिएका छन् ।

स्वास्थ्य शिविरमा केएमसीका विशेषज्ञ चिकित्सकहरुले नाक कान घाँटी, आँखा रोग, दन्त रोग, बाल रोग, स्त्री रोग, जनरल मेडिसिन, नसा तथा हाडजोर्नी लगायतको स्वास्थ्य जाँच गरेका थिए । अस्पतालले घरदैलोमै आएर निःशुल्क स्वास्थ्य जाँच गरी आवश्यक स्वास्थ्य परामर्श समेत दिएकोमा स्वास्थ्य शिविरमा सहभागी भएकाहरुले केएमसीलाई धन्यवाद पनि दिए ।

केएमसीका तत्कालिन कार्यकारी अध्यक्ष डा. सुनिल शर्माले २ वर्षअघी निःशुल्क स्वास्थ्य शिविरको अभियान थालनी गरेका थिए । केएमसीको गुणस्तरीय स्वास्थ्य सेवालाई आम नागरिक माझ पुर्याउनका लागि निःशुल्क स्वास्थ्य अभियान थालिएकोमा त्यसबाट हज्जारौं गरिब, विपन्न नागरिक सँगै महिला, बालबालिका तथा ज्येष्ठ नागरिक लाभान्वित भइरहेका छन् ।